Altzate Bizirik plataformako kide batek salaketa jaso du
Uztailean protesta egin zuten Urumea Berri etxe agentziaren aurrean Altzateko eremuan egingo den proiektua salatzeko. Bertan, bi kide identifikatu zituzten, eta batek salaketa jaso du. Elkarretaratzera deitu dute urtarrilaren 25ean.
Altzateko eremua. Uztailaren 16an Altzate Bizirik auzo ekimenak protesta egin zuen Oreretako Foru plazan lokala duen Urumea Berri etxe agentziaren aurrean. Plataformako kideek prentsaurrekoa bertan egin zuten Urumea Berrik Altzateko eremuan egin nahi duen “proiektu espekulatiboa salatzeko, pertsona orok behar lukeen etxebizitza eskubidea aldarrikatzeko eta Altzateko eremuan parkea egin dezaten eskatzeko”.
Uztaileko agerraldian, “Urumea Berri etxe-agentziak udalaren laguntzarekin egiten ari den negozioa” salatu zuten, “lur eremu publiko behar lukeena pribatu bihurtzen ari baitira, bertan etxeak eraikita”. Plataformako kideek eutsi dute “dagoeneko hasiak diren eraikuntza lanak baimenik gabe eta lur kontaminatuan eraikitzen hasi dira. Euren poltsikoak betetzeko jendearen osasunaren gainetik daudela argi uzten dute euren etengabeko diru gosea azaleratuta”.
Egun hartan, prentsaurreko batekin egin zuten protestan aurrez aipatutakoak salatu zituzten. Bertan zirela, “etxe agentziako langile batek poliziari deitu zion”, eta hauek bertaratu zirenean, plataformako “bi kide identifikatu” zituztela berretsi dute Altzate Biziriketik.
Identifikazio horietatik, plataformako kide bati salaketa heldu zaiola eta urtarrilaren 25ean epaiketara “langilea behartu zuela leporatuta” deitu dutela salatu nahi izan dute auzo ekimenetik.
Hori dela eta, urtarrilaren 25ean, asteartea, goizeko 09:00etan Donostiako epaitegiaren aurrean eta arratsaldeko 18:30ean Foru plazan biltzera animatu nahi dute plataformatik.
