Azken igandeko ordu txikietan igaroko da Korrika Pasaiatik
Apirilaren 10ean Donostian emango dituzte euskalduntzearen aldeko azken urratsak. Aurretik, Pasaiako lau barrutiak zeharkatuko ditu Korrikak.
![](https://oarsoaldea.hitza.eus/site/files/2022/01/46873882684_48fa44684b_o.jpg)
Gaur goizean atera ditu argitara 22. Korrikaren antolakuntzak martxoaren 31tik apirilaren 10era Amurriotik (Araba) Donostiara Euskal Herria zeharkatuko duen ibilbidearen detaileak. Azken eguneko (igandea) goizaldean sartuko dira korrikalariak Pasaian, 04:32an; Donibanetik Antxora lau barrutiak zeharkatuta, 05:30a pasata utziko dute udalerria.
Lezo atzean utzita, Donibane hartuko du euskararen aldeko martxak lehendabizi; Santiago plazako ontziralekutik itsasoz eramango dute lekukoa San Pedrora, bigarren barrutia parez pare zeharkatzeko gero, Albaolatik Ondartxo pasealekua hartu eta, Esnabide kalea Euskadi etorbidea bihurtzen denean tipi-tapa Trintxerpera helduko direlarik. Bakarra faltako zaie orduan: Antxo. Portuko Zeharbidetik helduko dira bertara, Buenavista pasa eta Eskalantegi kaletik sartzeko barrutira; anbulatoriora heltzean, Hamarretxetara bira egin eta, hura zeharkatuta, Nafarroa hiribidearekin egingo dute alde.
AEKren euskararen aldeko lasterketa ordu batzuk geroago bukatuko da Gipuzkoako hiriburuan, 09:05ean sartuko delarik Donostiako Alde Zaharrera, 12:30ean egiteko amaiera ekitaldia. Horrekin bukatuko da martxoan Araban hasiriko martxa. Ibilbidea, osorik, hemen kontsulta daiteke.