Eguzki: "Renferen aldiriko zerbitzuetan bada oso gaizki doan zerbait"
Azken hilotako atzerapenak eta informazio falta salatu du talde ekologistak. Eragindako udalek zuzenean Renfe interpela dezatela galdegin dute.
Hainbat erabiltzaile, Pasai Antxoko geltokian, Renferen trenetako batera igotzen. 
Oarsoaldeko Eguzki talde ekologistak Errenteria-Oreretako eta Pasaiako udalei galdegin die Renfe zuzenean interpela dezaten aldiriko trenen zerbitzua “behingoz duintzeko”, azken hilotako atzerapenak direla medio.
Hogei minutura arteko atzerapenak geroz eta ohikoagoak bilakatzen ari direla salatu du Eguzkik, zenbaitetan, zerbitzuak bertan behera ere gelditzen direlarik. Gertakari horiek garraio publikoaren erabiltzaileen egunerokoan ezinbestean sortzen dituzten kalteez gain, egoera are eta muturrekoagoa bilakatzen da pandemiaren testuinguruan, “ditxosozko birusaren kutsadura-arriskua” areagotuz.
Zerbitzuaren gabeziei gardentasun falta gehitu diote, geltokietako pantailek askotan ez baitute informazio zehatz ez eta zuzenik ematen. Are gehiago: “Tele-adierazleek ez dute funtzionatzen, bat-batean itzalaldiak gertatzen dira…”.
Eguzkik bat egin du, erabiltzaileen eskubideen izenean, Hirugarren Erraiak Kaltetutako Erabiltzaileak (HEKE) plataformak 2017tik ahotan dituen aldarriekin. Zerbitzuak hondoa jo, kalitatea “gutxieneko historikoetara” jaitsi delarik azken urtean.
Testuinguru horretan, tokiko gobernariengana jo dute, HEKEren bide beretik, udal arduradunei publikoki eskatuz modu formalean eska diezaiotela Renferi trenen zerbitzuaren kalitatea lehenbailehen leheneratu eta azalpenak eman ditzan, kalitate galeraren arrazoiak gardentasunez azalduz.
