Pasaiako 1.000tik gora etxek eta ikastetxe batek ez dute zuntz optikorik
EH Bilduk "onartezin" iritzi dio egoerari. San Pedron ia 400 dira konexio mota hura ez duten etxebizitzak, eta 600dik gora Donibanen.
Gorriz agertzen diren Donibane eta San Pedroko guneak dira, gaur-gaurkoz, zuntz optikorik ez dutenak. [Irudia: Banda zabal ultralasterra]. 
Pasaian kokaturiko 1.010 etxebizitza inguruk ez dute oraindik zuntz optikorik. Udalerrian dauden etxe guztiekin alderatuz hutsala iruditu daiteke zifra, baina oso bestelakoa den errealitate bat islatzen du etxe horiek guztiak biztanleria txikiena duten bi barrutietan daudela aipatzeak.
San Pedroko hirigune historikoko 380 eta Donibaneko 630 dira konexio mota hori ez duten etxeak. Horri gehitu behar zaio, gainera, azken barruti hartan kokaturik dagoen Pasaia-Lezo Lizeoa ikastetxeak ere ez duela tankera hartako estaldurarik 1.000tik gora ikasle hartzen dituen azpiegituretan.
Lehen barrutiaren kasuan, zuntz optikoa instalatu ahal izateko azpiegitura prest badago ere, oraindik ez dute konexiorik aipaturiko ehunka etxeek. Donibaneren kasuan sakonagoa da arazoa, halako kanalizaziorik ere ez baita existitzen, eta arazoak alde zaharrari eragiteaz gain, Meipi, Juan XXIII eta Lurdes Txiki auzoei ere eragiten die, besteak beste.
Pasaiako EH Bilduk “onartezin” iritzi dio egoerari. Koalizioak proposamen bat egin zion ekainean udal gobernuari (PSE-EEk eta EAJ): proba pilotu bat hastea zuntz optiko publikoko sarea instalatuz bai San Pedroko hirigune historikoan bai Donibanekoan, esperientzia ondo aterako balitz, gero udalerri osora zabaltzeko. Gaurdaino proposamenarekin loturiko erantzunik jaso ez dutela salatu du oposizioko taldeak.
