[Erreportajea] Hilerokoarekin ere ahalduntzeko, kopak
Lezoko Emakume Taldeak kopa menstrualak emango dizkie hala nahi duten emakume lezoarrei. Osasun, ingurumen, eta ekonomia arrazoiak bildu dituzte koparen aldeko egiteko.
Mireia Cuesta eta Maialen Pikabea, egitasmoaren kartela eta kopa bat eskuan, Saldise plazako eskailera moreetan. Lezoko Emakume Taldeak hilerokorako koparen edo kopa menstrualaren aldeko hautua egin du. Jarrera horren arrazoia ez da bakarra, hainbat dira. Tanpoiak eta konpresak behin erabiltzekoak dira, eta ezin birzikla daitezkeen osagaiak dituzte; kopak silikonazkoak dira, eta maiz erabiltzeko aukera dago. Gainera, luzera begira diru aurreztea dakar koparen erabilerak. Aldi berean, emakumeen osasunerako onuragarriago dira silikonazko kopak, tanpoiek batez ere arrastoa utz dezaketelako emakumeen gorputzean. Beraz, osasun, ingurumen eta ekonomia arrazoiak daude koparen alde egiteko hautuan.
Hori horrela, koparen erabilerarako kanpaina hasi dute emakume lezoarrek, eta horren barruan, horiek banatzeari ekin diote. Lehen banaketa atzo egin zuten; bigarrena etzi da, 11:00etatik 13:00etara Gurutze Santuaren plazan. Doan emango dizkiete hala nahi duten emakume guztiei, baina derrigor lezoarrak izan behar dute emakume horiek. Koparen bila doazenei agiria eskatuko diete Lezokoak direla ziurtatzeko.
Lezoko Emakume Taldeko kide Mireia Cuestarekin eta Maialen Pikabearekin izan da hitza egitasmoaren gaineko xehetasunak biltzeko. Adierazi dute iniziatibak Lezoko Udaleko Berdintasun Sailaren eta herriko osasun zentroaren babesa duela. Gainera, 2022rako ezarri dituzten hamabi lan ildoetatik lehena dela jakinarazi dute: Berdintasuna hitzak hamabi hizki dituen moduan, beste hainbeste egitasmo garatuko dituzte urtean zehar, bat hilabeteko.
Ahalduntzea
Bi taldekideek zehaztu dutenez, kopa menstrualaren iniziatiba Astigarragan iaz egin zuten, arrakastaz. Lezora ekarri dute. «Emakumeek autonomia lortzeko eta erabakiak euren kabuz hartzeko bidean, finean ahalduntzeko zereginean, ari gara lanean Lezoko Emakume Taldean. Kopa menstrualaren egitasmoa zentzu horretan doa», nabarmendu du Pikabeak. Cuestaren arabera, geroz eta gehiago dira kopa erabiltzen dutenak, gazteak tartean: «Ahalduntzerako bidean, hilerokoarekin ere emakumeok nola jokatu erabaki behar dugu. Aurten garatuko ditugun beste egitasmoetan ere bide horri eutsiko digu».
