Gezalako Lagunen Txartelaren onuren berri eman du udalak
25 euroren truke, urtean zehar emanaldiak doan ikusteko, deskontuak baliatzeko, eta zozketetan parte hartzeko aukera dute txartela erosten dutenek. Oparitarako egokia dela esan du udalak.
Era guztietako arte eszeniko ikuskizunak jaso ohi ditu Gezalak. Gezalako Lagunen Txartelaren onuren berri eman du Lezoko Udalak. 25 euroko prezioa du txartelak (20 euro Gazte Txartela dutenentzat), eta erosten dutenek hainbat abantaila dituztela jakinarazi dute. Horregatik, erosteko bai, baina senide eta lagunei oparitzeko moduko gaia dela adierazi dute Kultura Sailetik. Gezalako emanaldi askotan (antzerkia, dantza, musika eta bestelakoak) helduen sarreraren prezioa zortzi eurokoa izan ohi da, eta haurrenetan hirukoa.
Horrela, txartela dutenek, onura hauek izango dituzte (urte osoko iraute epea dute txartelek):
- Bi musika kontzertu doan ikusteko aukera urteko programazioan
- Bi dantza emanaldi doan ikusteko aukera urteko programazioan.
- Bi sarrera doan haurrentzako ostiraletako emanaldietarako
- Sarrerak erosteko lehentasuna. Sarreren salmenta orokorra hasi aurretik, txartela dutenek jakingo dute zein den kultur ekitaldien agenda, eta sarrerak lehenago erosteko eskubidea izango dute.
- Txartela dutenen artean, ekitaldi bakoitzerako lau sarrera zozkatuko dira.
- Kultura Sailak programatutako ikuskizun guztietarako, %30eko deskontua.
