Gizarte bazterketa arriskuan dauden pertsonak lan munduratzeko laguntzak, martxan
Oarsoaldea Garapen Agentziaren Berpiztu programaren ildoetako bat inklusioarena da, eta helburua bazterketa arriskuan dauden pertsonen inklusioa sustatzea da. Laguntzak otsailaren 4ra arte eskatu daitezke.
Berpiztu laguntzak. Berpiztu programako Laneratze Poloaren barruan, Oarsoaldea Garapen Agentziak zenbait jarduera ildo planteatzen ditu. Horietako bat inklusio proiektuei dagokiena da, eta sare horren helburua bazterketa arriskuan dauden pertsonen inklusioa sustatzea da, eskaintzen zaizkien programen, zerbitzuen eta baliabideen eraginkortasuna hobetuz, eremu horretan jarduten duten eragile publiko eta pribatuen arteko lan koordinatuaren bidez.
Garapen Agentziaren deialdi honek gizarteratzen eta lan merkatuan sartzen lanean aritzen diren erakundeen saretik egoera kalteberan dauden pertsonentzat kalitatezko enplegu inklusiboa bultzatu nahi du.
Laguntza hau jaso dezakete Oarsoaldean bazterketa edo arrisku egoeran dauden pertsonak eta lan merkatuan sartzeko proiektuak 2023ko maiatzaren 31 baino lehen burutzen dituzten irabazi asmorik gabeko erakunde publiko edo pribatuak. Laguntza hauek eskatzeko epea otsailaren 4ra arte, ostirala, egongo da zabalik.
Honakoak dira diruz lagundu ahal izango diren jarduerak: gizarteratzeko ibilbide integratuak; enplegu eta prestakuntza programak; eskualdeko enpleguaren aktibazioa bultzatzen duten proiektuak; edo bazterkeria arriskuan dagoen kolektiboa laneratzea helburu duten jarduera berritzaileak. Pertsonen parte hartzea proiektu hauetan doakoa dela zehaztu dute agentziatik.
Laguntzak diruz lagundu daitezkeen kostuen %100ekoak izan daitezke. Erakunde bakoitzeko jaso beharreko laguntzaren gehiengoa 100.000 eurokoa izango da. Diruz lagundu daitezkeen kostutzat hartuko dira erakunde eskatzaileak aurkezten duen jardueraren aurrekontu banakatu eta xehatuan jasota dauden eta jardueraren garapenari lotuta dauden kostuak.
Erakunde bakoitzak gehienez hiru proiektu aurkeztu ahal izango ditu, eta eskaerak telematikoki aurkeztu ahal izango dira Oarsoaldeko webgunean.
Diru laguntzen %50a proiektuaren hasiera jakinarazi ondoren emango da, eta gainontzeko %50a gizarteratzeko eta laneratzeko proiektu bakoitza amaitzean eta diruz lagundutako jarduera justifikatu ondoren emango da. Erakunde onuradunak diruz lagundutako jarduera egin izana justifikatu beharko du, bai eta jarduera horrek sortutako kostuak ere, 2023ko maiatzaren 31 baino lehen.
Laguntza edo argibideren bat behar izanez gero, interesdunak Garapen Agentziarekin harremanetan jar daiteke 943 51 02 00 telefonora deituz (astelehenetik ostiralera 09:00etatik 14:00etara) edo dfreire@oarsoaldea.eus helbide elektronikora mezua idatziz.
