Langabeen prestakuntza finantzatzeko laguntzak abian dira
Oarsoaldea Garapen Agentziak langabeen prestakuntza eta enplegagarritasuna hobetzen lagunduko duen plan bat planteatu du, eskualdeko langabezia tasan eragiteko. Laguntzak eskatzeko azken eguna otsailaren 4a da.
Berpiztu laguntzak. Berpiztu programako Laneratze Poloaren barruan, Oarsoaldea Garapen Agentziak langabeen kualifikazioa eta enplegagarritasuna hobetzen lagunduko duen Enplegu Integraleko Plan bat abian jartzea planteatu du, eskualdeko langabezia tasan eragiteko. Aipatutako enplegu planak hainbat jarduera ildo ditu. Horietako bat lanerako prestakuntzaren ildoa da, enplegurako lanbide heziketa tresna bat baita modu erabakigarrian lan merkatuan sartzeko. Prestakuntza ekintza horiek bidez, langabeek prestakuntza eskaintza zabala izatea lortu nahi da, euren enplegu aukerak hobetzen laguntzeko.
Laguntza hori jaso ahal izango dute Oarsoaldean 2023ko maiatzaren 31 baino lehen, langabeei zuzendutako prestakuntza ekintzak egiten dituzten prestakuntza erakunde pribatuek edo publikoek.
Diru laguntzaren zenbateko osoa hura osatzen duten prestakuntza ekintza bakoitzaren diru laguntzaren zenbatekoaren baturak zehaztuko du. Erakunde bakoitzeko jaso beharreko laguntzaren gehieneko muga 100.000 eurokoa izango da. Agentziatik zehaztu dute laguntzak eskatzeko epea otsailaren 4ra arte, ostirala, egongo dela zabalik.
Diruz lagundu daitezkeen jarduerak izango dira langabe partaideen prestakuntza beharrei erantzun nahi dieten prestakuntza ekintzak, baldin eta haien enplegagarritasuna areagotzeko badira. Programa daitezkeen prestakuntza ekintzak bi taldetan sailkatuko dira:
- Ziurta daitekeen prestakuntza: Lanbide Prestakuntzen Katalogo Nazionalarekin lotutako ekintzak profesionaltasun ziurtagiriak lortzeko; programa daitezke ibilbide osoen arabera, espezialitatearen ordu guztiak betetzen badira, edo prestakuntza moduluen arabera. Prestakuntza 1., 2. edo 3. mailakoa izan daiteke.
- Ziurta ezin daitekeen prestakuntza: prestakuntza espezialitateen katalogotik lortutako gaitasunak egiaztatzeko aukerarik ematen ez duten prestakuntza ekintzak dira. Bi motatakoak izan daitezke: gaitzen ez dutenak, edota gaitzen duten prestakuntza ekintzak.
Nolanahi ere, prestakuntza ekintzak modalitate presentzialean eman beharko dira, eta doakoak izango dira horietan parte hartzen duten ikasleentzat.
Proiektuan sartzeko eskaerak telematikoki aurkeztu ahal izango dira Oarsoaldeko webgunean.
Prestakuntza ekintza bakoitzaren %50a jarduera hasi dela jakinaraztean emango da, eta gainontzeko %50a, berriz, prestakuntza ekintza bakoitza amaitzean, diruz lagundutako jarduera justifikatu ondoren. Kasu guztietan, erakunde onuradunak diruz lagundutako jarduera egin izana justifikatu beharko du, bai eta jarduera horrek sortutako kostuak ere, 2023ko maiatzaren 31 baino lehen.
Laguntza edo argibideren bat behar izanez gero, interesdunak Garapen Agentziarekin harremanetan jar daiteke 943 51 02 00 telefonora deituz (astelehenetik ostiralera 09:00etatik 14:00etara) edo dfreire@oarsoaldea.eus helbide elektronikora mezua idatziz.
