Xanisteban Eguna, otsailean? Orgasmikoa izango da
Abenduan bertan behera geratutako ekitaldia datorren larunbatean eskainiko dute. Oiartzungo sortzaile gazteek bost lan taularatuko dituzte.
Gazte sortzaileek larunbatean eskainiko dituzte beraien lanak. Ez larritu, titularrak ez du egia osoa esaten: Xanisteban Eguna ez da otsailean ospatuko. Xanisteban Egunean —abenduaren 26an— Oiartzungo sortzaile gazteek egin beharreko emanaldia otsailean egingo dute. Zehazki, datorren larunbatean, hilak 5.
Bost pieza taularatuko dituzte, 18:28etik aurrera (oiartzuarren puntualtasuna-rentzako errezeta izango da…). “Margolanak ardatz dituzten pieza orgasmikoak” eramango dituzte udaletxeko pleno aretoko oholtzara. Honakoak dira:
- Orgasmo Infinitua, June San Sebastian, Udane Eskudero, Xabier Belaunzaran, Izar Gaztelumendi eta Luix Mitxelenarekin.
- Literatura eta musika uztartuko dituzte Amaia Belaunzaranek, Josu Ibargurenek eta Malen Elizasuk Hiru izeneko emanaldian.
- Interdiziplinarra, Izaro Retegi, Lohizune Telletxea eta Izaro Telletxearekin.
- Asegabezia antzerki lana, Ibai Zarketa, Ekain Elizasu eta Daniel Pikazorekin.
- Hutsetik bat-egin antzerki poetikoa, Enara Hernandez, Oihan Astigarraga eta Alain Mendizabalekin.
Abenduko saiorako sarrerak erosi zituztenek larunbaterako baliatu ditzaketela gogorarazi dute antolatzaileek.
Titularraren zati batek gezurra zioela esan dugu. Bigarren zatiak? Xanisteban Egun Artistikoarekin gozatzeko aukera dutenek esperimentatuko dute. Menua badakite zein den.
