Udal Txistulariak, otsailerako prest
Emanaldiz jositako hilabetea antolatu dute txistulariek. Igandean hasiko dira 09:00etan, eta diana Pontikako kaleetan murgilduko da.
Udal Txistulariak. Emanaldiz betetako hilabetea antolatu dute Udal Txistulari bandakoek. Igande honetan, hilak 6, hasiko dira, Pontika auzoan egingo duten dianarekin. 09:00etan hasiko dira udaletxetik, eta Pontika auzora abiatuko dira txistulariak. Pontikako kaleak alaitu ostean, udaletxean amaituko dute 10:00etan ohikoa den bezala. Honako zortzikoak izango dira igandeko protagonistak:
- Judizmendi. Luis Aranburu Martienz de San Vicente.
- Irulea. Jose Ignazio Ansorena Miner.
Hurrengo igandean, hilak 13, Beraungo auzoak hartuko du Pontikako dianaren lekukoa. 09:00etan hasiko dira, eta Beraungo kaleetatik ibili eta gero, 10:00etan amaituko dute udaletxean. Zortziko hauek joko dituzte Beraungo dianan:
- Juana Bixenta Olabe. Bertso doinua. Mold.: Jose Ignazio Ansorena Miner.
- Loa, loa. Jose Ignazio Ansorena Miner.
Otsailaren 20rako, berriz, Inauterietako kontzertua antolatu dute. Herri arte eskolako txistu, perkusio eta dantza ikasleekin batera, Udal Txistulariek Inauteriei eskainitako emanaldia egingo dute Koldo Mitxelenako jolastokian. 12:30ean hasiko da kontzertua, eta gogorarazi nahi izan dute, pandemia garaiko protokoloak aintzakotzat hartuz, emanaldia eserita soilik jarraitu ahal izango dela, eta aforoaren edukiera ere kontuan hartuko dela. Egun hartan emango diren argibideak jarraitzea eskatu dute antolatzaileek.
Emanaldiz jositako hilabetearekin amaitzeko, hileko azken igandean, hilak 27, diana Galtzaraborda eta Igantzi auzoetan barrena murgilduko da. 09:00etan hasiko dira, eta auzoetako kaleak alaitu ostean, udaletxean amaituko dute goizeko 10:00etan. Hurrengoak izango dira azken dianako protagonistak:
- Inauterietakoa. Ezezaguna. Mold.: Jose Ignazio Ansorena Miner.
- Karrikaz karrika. Santiago Irigoien.
