Kontxa Murgia Egaña omenduko dute asteburuan
Ostiralean, euskara eta galizierazko poemak errezitatutako dituzte, musikaren laguntzarekin. Larunbatean Murgia zena omenduko dute, haren jaiotetxean.
Ostiralean poemak errezitatuko dituzte, euskaraz eta galegoz. Kontxa Murgia Egaña zena omenduko dute datorren asteburuan. Ohi bezala, Fato Cultural Daniel Castelao eta Oiartzungo Udalak indarrak batuko dituzte Galiziako Rexurdimento-aren bultzatzaile Manuel Martinez Murgiaren ama gogorarazteko.
“Honela”, azaldu dute antolatzaileek, “Euskal Herria eta Galizia lotzen dituen figura historiko honi esker, bi herrialdeen arteko senidetasuna sustatu nahi da”.
1806 jaioa
1806ko otsailaren 29an jaio zen Murgia, Oiartzunen, egun Manuel Lekuona biblioteka den eraikinean. Orduan organistaren etxea ere bazen, eta hain zuzen, Domingo Murgia Azkonobieta organistaren eta Maria Phelipa Egaña Lizasoren alaba gazteena izan zen Kontxa Murgia.
Bederatzi seme-alabetako lau Oiartzunen jaio ziren. Kontxa haur zela joan zen familia Tolosara bizitzera aitak hango organista plaza lortu zuelako. Ondoren, arrazoi politikoengatik (liberalak ziren familian), aita-alabek Galiziara jo zuten 1823an, Frantziako armadako San Luisen Ehun Mila Semeen inbasioaren ondoren.
1833an jaio zen Manuel Martinez Murgia, Kontxaren seme zaharrena, gerora Galiziako abertzaletasunaren aitzindaria izan zena. Academia Galegaren sortzaile eta lehenengo presidentea izan zen, eta Rosalia de Castro poeta ezagunaren senarra.
Egitaraua
- Hilak 11, ostirala: Poema errezitaldi musikatua euskaraz eta galegoz. Irakurleak: Xose Estevez eta Antton Kazabon. Musikariak: Haizea Lekuona, Oihane Mitxelena eta Edurne Saizar (udaletxeko areto nagusian, 19:00etan).
- Hilak 12, larunbata: Omenaldia Kontxa Murgiaren jaiotetxean (Manuel Lekuona bibliotekan, 12:00etan).
