Haur, gazte eta adinekoentzako gune bana izango ditu Sarriegi plazak
Obrak bukatutakoan, haur jolasentzako gunea, kirol anitzeko pista eta elkargune bio-osasungarria izango ditu plazak.
Plaza berrurbanizatzeko lanak "erritmo onean" doazela adierazi dute udal arduradunek. 
Sarriegi plaza birgaitzeko obrak “erritmo onean” doazela eman dute aditzera Errenteriako Udaleko arduradunek, eta horiek “laster” bukatzea aurreikusi dutela. Hori gertatzean, haur, gazte eta adinekoentzako hiru gune berri gaituko dira.
Lehen gunea 0 eta 12 urte bitarteko haurrentzako izango da, haur jolasak izango dituelarik. Bigarren espazio bat ahalbidetuko dute kirol anitzeko pistarekin, futbol ateak eta saskibaloiko saskiak instalatuz. Azkenik, elkargune izatera bideratutako espazio bat sortuko da, adineko pertsonentzako tresna bio-osasungarriak izango dituena.
Lanak plazarako irisgarritasuna hobetzeko ere baliatuko dituzte; baita berdeguneak handitu eta puntu ilunak kentzeko ere. Haurrentzako jokoen fabrikazioa eta instalazioa datozen egunetan kontratatuko dira, gehienez 99.5oo euroko aurrekontuarekin, eta plazako lanak bukatu ondoren instalatuko dira.
Sarriegi gunea eraberritzeko arrazoia azpiko Isidro Ansorena garajeetako kontzesionarioek egindako obrak izan ziren. Zenbait lan egin zituzten eraikinaren estalkia iragazgaizteko eta urik sar ez dadin, eta horretarako, gainean zegoen Sarriegi plaza osoa altxatu behar izan zen. Garajeen obrak bukatuta, iazko irailean ekin zien udalak berrurbanizatzeko lanei, 364.000 euroko aurrekontuarekin.
