Lezoko Udalaren zorra hutsean geldituko da martxoan
Gobernu taldearen buruek adierazi dute 2015ean udalak zuen 2,9 milioi euroko zorra zeroan geldituko dela datorren hilabetean.
Sanchez eta Martiarena, zorraren kitapenaren berri ematen. Gobernu taldea osatzen duten alderdien buruek, EAJko Jesus Mari Martiarenak eta PSE-EEko Joxean Sanchezek, iragarri dute Lezoko Udalak martxoan amortizatuko duela zuen zorra, hau da, hutsean geldituko dela zordunekin. “2015etik EAJ eta PSE-EE udal gobernuan sartu zirenetik udalaren zorra amortizatzea zen helburuetako bat. 2,9 milioi eurokoa zen une hartan”.
Udalaren egoera ekonomikoaren saneamendua egikaritzeko “ahalegina” nabarmendu dute bi hautetsiek, “are gehiago bizitzen ari garen pandemiaren ondoren”. Gainera, hainbat udal eta zerga 2017tik izoztuta daudela zehaztu dute, hala nola Ekonomia Jardueren Gaineko Zerga, Ondasun Higiezinen Zerga, hondakinena, binetarena (jaitsierarekin) eta urarena. “Gure ustez, gobernu taldearen kudeaketa ekonomiko eta finantzarioa bikaina izan da, magnitude positibo guztiekin, zero zorrarekin”. Horren gainean, adibide bat jarri dute: udalak dituen fakturak batez beste 4,9 eguneko epean ordaintzen ditu, “legezko epea 30 egunekoa bada ere”.
Zorra kitatzeko arrazoien artean, udalaz gaindiko finantzaketa iturriak aipatu dituzte Martiarenak eta Sanchezek: “Horri esker, udalak mantendu egin ditu inbertsioei, azpiegituren hobekuntzari eta zerbitzu publikoei dagokienez herritarren eskaera guztiei erantzuteko partidak”. Horren harira hainbat inbertsio aipatu dituzte, tartean herrian egin diren kaleko igogailuak, Lezo Herri Eskolaren estalkia, asfaltatze lanak, etxebizitza berriak edo osasun zentro berria.
