'Kirolak eta Joko Olinpikoak', aurtengo Inauterietako gaia
Proposatutako gaien artean bozka gehien lortu dituena da, eta Inauteri Batzordeak dei egin du haren inguruan mozorratu eta lekuak apaintzera.
Aurtengo Errenteriako Inauterietako gaia aurkeztu dute. Prentsaurreko bidez, Errenteriako Inauteri Batzordeak “Kirolak eta Joko Olinpikoak” aurtengo Inauterietako gai nagusia izango dela jakinarazi du. Bada, bozkatuena izan da udalak proposatutako sei gaien artean: janaria, marrazki bizidunak, komikiak, mitologia, artea eta irabazle atera den kirolak eta Joko Olinpikoak. Ondorioz, Inauteri Batzordeak dei egin die herritar, denda, taberna eta bestelakoei gai nagusiaren inguruan mozorratu eta lekuak apaintzera.
Osasun egoera dela medio, jende-pilaketak ekiditeko aurreikusitako zenbait jarduera bertan behera utzi badira ere, otsailaren 18tik martxoaren 1era eskaintza anitza antolatu dela oroitarazi du batzordeak. Besteak beste, kirol jolasak, tailer desberdinak eta photocallean argazkiak. Gainera, Katuko, Asteme eta Oilarqueen herriko pertsonaiekin gozatzeko aukera egongo da ere.
Datorren astean emango dute ezagutaraztera egitarau osoa, Herri Biziaren webgunea bidez.
