Sableak dantzan Bekoerrota kiroldegian, eskrimarekin
Eskrima eskolak ematen dituzte Lezoko kiroldegian. Juan Estevez irakasleak azaldu du borroka kirola baino askoz gehiago dela, eta ezagutu ahala are erakargarriagoa egiten zaiela haurrei.
Udako eskaintzaren barruan, eskrima eskolak eman dituzte azken urteetan Bekoerrota kiroldegian. Jarraipen handikoak izan dira. Beraz, horren arduradunek 2021eko udan erabaki zuten kiroldegiaren sasoiko eskaintzaren barruan sartzea kirol hori ardatz duten eskolak, udalarekin eta kiroldegiarekin elkarlanean. Arrakastaz ari dira tiratzaile edo eskrima kirolari gazteak sableak aurrera-atzera astintzen. Horren seinale, denboraldiko Gipuzkoako eskolarteko lehen topaketan ohorezko hainbat postu lortu zituztela bertako tiratzaileek, hasiberriak izan arren. Asteburuan dute bigarren lehia.
Juan Estevez da eskrima eskolen arduraduna. Madrildarra jaiotzez, sei urte daramatza Gipuzkoan; Fortuna Kirol Elkarteko kide da. Astean behin dator Bekoerrotara eskrima eskolak ematera. «Euskara ikasten ari naiz. Komunikatzea oso garrantzitsua da kirol honetan, eta bertako hizkuntzan aritzea ezinbestekoa da azalpen horiek zuzen emateko. Haurrekin komunikazio zuzena izan nahi dut, eta euskara da horretarako bidea», zehaztu du. Sona handiko tiratzailea da Estevez, eta besteak beste, Espainiako selekzioarekin aritutakoa da nazioarteko txapelketetan.
Adinaren araberako bi talde osatu dituzte Lezon. Eskriman, kategoriak adinaren araberakoak dira, ez beste borroka kiroletan bezala kirolariaren mailaren edo pisuaren araberakoak. Taldeetako bat 15 urtetik beherakoena da, zazpi kide dira; bestean hiru dira, bost urtekoak: «Eskriman oinarritutako pedagogia sistema erabiltzen dugu haiekin. Esperimentu antzekoa ari gara egiten bi taldeak nahastuz. Emaitza oso ona ematen ari da, eta haurrak nahiz ni neu oso pozik gaude», zehaztu du Estevezek.
Ezpata eta borroka baino gehiago
Estevezek onartu du haurrak erakarriak sentitzen direla ezpatarekin aritzearekin; txikitan, nork ez du borrokatu makil batekin beste baten kontra? «Baina kirol bezala aski ezaguna ez den arren, ikasleei esplikatzen diezunean eskrima oso arautua dagoela, mugimendu zehatzak eta balio batzuk dituela, elkarri minik ez diotela egiten, eta kirol bezala konpletoa dela, iritzia aldatzen dute. Orduan haurrek ikasten dute astoarena egitearekin ez duela zerikusirik honek, eta askoz interesgarriagoa egiten zaie».
Eskrima irakasleak azaldu du helduak ere joan direla harengana kirol horretan aritzeko prest zirenak, «baina ezin izan dugu talderik atera, gutxi zirelako». Dena dela, zalantzak argitzeko hari deitzeko (610 37 91 23) edo posta elektronikoa idazteko eskatu du.
