Erretiratuen elkarteak batzar orokorrak egiten ari dira
Galtzarabordakoa eta Gabierrotakoa egin dituzte jada, eta datorren egunetan izango dira gainontzeko sei erretiratuen elkarteetako batzarrak. Hurrengoa ostiralean, hilak 18, izango da Kaputxinoetako San Jose elkartean.
Niessen Kultur Aretoan egingo da Olibeteko batzarra. Urtero bezala, otsaila eta martxoan zehar, Errenteriako zortzi erretiratuen elkarteetako batzar orokorrak egiten ari dira. Galtzarabordakoa eta Gabierrotakoa dagoeneko egin dituzte, eta orain, gainontzeko sei elkarteen txanda da. Erretiratuen elkarteetako koordinaziotik zehaztu dute batzar guztiak euren elkarteetan egingo direla Olibetekoa izan ezik, izan ere, Olibeteko Beti Bizkor elkarteko batzarra Niessen Kultur Aretoan egingo da.
Hurrengo batzarra Kaputxinoetako San Jose elkartean izango da ostiralean, hilak 18, 17:30etik 18:00etara. Lekukoa Alabergako La Magdalena elkarteak hartuko du otsailaren 22an, asteartea, 17:30etik 18:00etara. Honakoa izango da otsaileko azken batzarra.
Azken lau bilerak martxoan egingo dira. Lehen batzarreko protagonistak Olibeteko Beti Bizkor elkarteko erretiratuak izango dira, baina, aurrez aipatu bezala, bilera ez da euren elkartean egingo, baizik eta Niessen Kultur Aretoan. Batzar hori martxoaren 1ean, asteartea izango da, 17:30etik 17:45era. Hurrengo batzarra hilaren 7an, astelehena izango da Beraungo Bienvenido elkartean, 17:30etik 18:00etara. Pontikako Arramendipe elkartearen txanda izango da hurrengoa, hilaren 14an, astelehena, 17:30etik 18:00etara. Azken batzarra hurrengo egunean egingo da Agustinetako San Agustin elkartean. Azken batzar hori hilaren 15ean, asteartea, izango da, 17:00etatik 17:30era.
