Etxegabetze saiakera bat salatu dute Sabadell bankuaren aurrean
Kaleratzeen kontrako mugimenduak deituta, elkarretaratzea egin dute sukurtsalaren aurrean. Etxebizitza funts putre bati saldu diotela esan dute.
Biteri kaleko bulegoaren aurrean elkarretaratu dira. Etxegabetzeen kontrako mugimenduak elkarretaratzea egin du gaur eguerdian, Sabadell bankuaren bulegoaren aurrean.
Salatu dutenez, 2020an huts egindako etxegabetze saiakera bati jarraipena emateagatik egin dute protesta. Orduan epaitegiek arrazoirik eman ez zietela gogorarazi dute.
“Oraingoan”, esan du Oarso Bidasoko Stop Kaleratzeak mugimenduak, “Solvia higiezinen enpresaren aginduz, ateari ostikada bat eman diote, sarraila lehertu eta aldatu dute, eta burdin-sareak eta alarmak jarri dituzte”.
Bankuaren “egite mafiosoak” ezagutzen dituztela adierazi dute. “Planteatzen duten tranpa sinplea da, eta, zoritxarrez, funtzionatu egiten du”, esan dute. Horrela, bankuak putre-funtsetan parte hartzen dutela adierazi dute, eta etxebizitzak bere balioaren %10aren truke saltzen dituztela.
“Putre-funtsak etxegabetu eta espekulatu egiten du etxebizitzekin, eta Sabadell bankuak, berriz, ez daki ezer. Emaitza: hipoteka ez ordaintzeagatik kaleratzen dituzten familiak, gehienetan kredituen gehigizko baldintzek eragindakoak”.
Diru hori “paradisu fiskaletara” bidaltzen dutela salatu dute, “Ogasunak ilargiari begiratzen dion bitartean”. Ildo horretan, nabarmendu dute Sabadell bankuak eskuak garbitzen dituela.
“Ez diogu utziko! Sabadell Bankua da arpilatze mafioso honen erantzule, eta horrela salatzen dugu”.
