Lezoko Udala: "Prest azaldu gara konponbide ildoak bideratzeko"
Lezoko kirol guneetako langileen kezken harira, Lezoko Udalak iritzia eman du. Langileen eta enpresa kudeatzailearen arteko gatazka dela esan du, eta pandemiaren eragina nabarmena izaten ari dela.
dav Lezoko kirol instalazioetako langileak borrokaldi betean daude euren lan baldintzen alde, eta kirol instalazioen egokitzapena eskatzeko. Horren aurrean, HITZA-k hala eskatuta, gatazkaren gainean duen iritzia eman du Lezoko Udalak. Langileek esandakoak hilaren 4ko astekarian nahiz webgune honetan ditu jasoak hedabide honek.
Udal iturriek zehaztu dute indarrean den gatazka «gehienbat» langileen eta guneak kudeatzen dituen enpresaren artekoa dela, eta «aspalditik» zutela horren berri bi alde horiekin izandako harremanen ondorioz: «Udalak zail du enpresa-langile arteko negoziazio harreman batean sartzea, baldin eta enpresak lan arloan indarrean dagoen araudia betetzen badu. Udalak eskuan duen informazioaren arabera, horrela da».
Kirol sailetik onartu dute 2018an egitekoa zen esleipen prozesu berriak ez duela oraingoz aurrera egin. Baina argitu dute azken esleipena 2016an egin zela, «ez 2014an». Hori atzeratzearen arrazoietako bat izan da, herriko etxearen arabera, esleipen berrian lan baldintza hobeagoen bermea jaso nahi dutela. «Prozesu honetan, gainera, pandemia egoerak ez du batere lagundu kirol instalazioen erabileran, eta ondorioz, diru sarreretan izugarrizko eragina izan du». Beharginen baldintzen okertzearen beste arrazoietako bat kirol guneetako langileen hitzarmena 2012tik berritu ez izana dela adierazi du udalak: «Baina hori ez da gure eskumena. Aurretik instalazioak kudeatu zituen enpresarekin tokiko hitzarmena ixten saiatu ziren langileak, eta ez zuten lortu».
Dena dela, Kirol Sailetik baieztatu dute udala bi aldeekin (langileak eta enpresa) esertzeko prest dagoela, «konponbide ildoak bideratzeko. Kudeaketaren esleipen prozesu berria kaleratzear da, eta horretan saiakera egingo da langileek baldintza hobeak izan ditzaten».
Instalazioak
Lan baldintzez gaindi, Altzateko eta Bekoerrotako langileek instalazioen gaineko ezinegona azaldu dute. Ez daudela ondo esan dute, langileen eta erabiltzaileen kalterako. «Egia da esku-hartze garrantzitsuak egiteke daudela, baina egia da ere beste inbertsio garrantzitsu batzuk egin direla». Hobetze lan horien artean Altzateko aireztatze sistema berria aipatu du udalak, baita igerilekuetako uraren iragazte azpiegitura erabat berritu dela ere. «Altzateko igerileku txikia kentzea enpresa kudeatzailearekin adostu zen, eta beste aukera berri eta erakargarri bat eraiki».
Bekoerrotan, berriz, fitness aretoaren ekipamenduan egindako «inbertsio handia» nabarmendu du udal erakundeak, «kalitatezko ekipamenduarekin. Gainera, ziklo areto berria sortu da». Hala ere, Bekoerrotako fatxadak eta sabaiak konpondu behar direla onartu du udalak: «Baina herriak behar asko ditu, eta aurrekontua bakarra. Lehentasuna duten beste lan batzuk egin ondoren horri eutsiko zaio».
Bien bitartean, langileek kaleko mobilizazioak hasi dituzte bizi duten egoera jendartera zabaltzeko asmoarekin. Goiko irudia joan den ostiralean egin zuten elkarretaratzearena da, udaletxearen parean.
