Lezoko gobernu taldeak herriko ur guztiak Añarbek kudeatzea nahi du
Orain arte herriko uren %70 kudeatu du mankomunitate horrek. Gainontzeko %30 udalak kudeatzen du, Jaizkibelgo urekin.
Lezoko gobernu taldeak (EAJk eta PSE-EEk osatzen dute) herriko ur horniduraren %100a Añarbek kudeatzea nahi du. Orain arte, ur erakunde horrek herriko uren %70 kudeatzen du, eta asmoa da gainontzeko %30a ere hariei esleitzea. Añarbek kudeatzen ez zuen %30 hori Lezok Jaizkibelen dituen biltegietatik jasotzen du, eta batez ere industrialdeak, baserriak eta landa eremua hornitzen ditu. “Hitzarmen hau hornidura sare integrala hobetzeko lanean jarraitzeko lehen urratsa da”, esan du gobernu taldeak.
Proposamenaren hitzarmena onartzea udalbatzarrera eramango du gobernu taldeak. Hilaren 23ko 09:00etan izango da ezohiko osoko bilkura udaletxean. Gobernu taldeak gehiengoa duenez, ziurrenik aurrera aterako da Añarbek herriko urak %100ean kudeatzeko proposamena.
Gobernu taldeko kideek adierazi dutenez, hainbat abantaila izango ditu ur-horniduraren aldaketak horrek: “Zerbitzuaren kalitatea eta kantitatea hobetzea da helburua. Giza baliabideak eta baliabide teknikoak egunean 24 orduz ziurtatzea izango litzateke beste abantaila bat, urteko 365 egunetan”. Gainera, ura banatzeko sisteman ere aurreikusi dituzte aldaketak, udal gobernuaren proposamenean hala ageri denez. Horrez gain, ingurumen arrazoiak ere argudiatu ditu udalak aldaketa proposamenerako: udan herriko erreken emari minimoa bermatuko litzateke, “errekek ez dute flora eta fauna mantentzeko behar besteko emaririk”. Eta hornidura sistemak “osasun-araudi tekniko zorrotza” beteko lukeela uste du gobernu taldeak: “Erantzukizuna Añarberena izango da, ez Lezoko Udalarena”.
Proposatutako akordioaren arabera, goi-mailako ur hornidura sarean hobekuntzak egingo lituzke Añarbek, eta tartean industrialdeetarako nahiz landa eremurako ur hornidura bermatzeko biltegi berria egingo luke: horietarako inbertsioa 2.650.000 eurokoa litzateke. Gainera, behe-mailako sarean ere 587.000 euroko kostua duten lanak egingo lituzke Añarbek (zuntz zementuzko hodiak kendu, eta hirigunera Darietako biltegiko ura iritsiko dela bermatzea). Udalak horien %1,9 ordaindu beharko lituzke, Añarbeko Mankomunitateko kide delako, 61.513 euro denera.
