'Entzunez Eraiki' egitasmoaren lehen saioa egin du EAJk
Proiektuko lehen topaketa Errenteria-Oreretan egin zen larunbatean. Egitasmoaren helburua da entzute aktiboaren bidez, proiektu politikoa gizarteari zabaltzea, ekimenak kontrastatzeko eta proiektuak herritarrekin partekatzeko.
![](https://oarsoaldea.hitza.eus/site/files/2022/02/entzunez-eraiki.jpg)
EAJk ‘Entzunez Eraiki’ proiektuaren baitan antolatutako gizarte politikei buruzko lehen topaketa egin zuen larunbatean Errenteria-Oreretan, Olatz Peon Tolosako alkatearen eta topaketen arduradunaren eta Maite Peña Gizarte Politiketako foru diputatuaren eskutik. “Entzute aktiboko prozesu baten bidez”, alderdiak bere proiektu politikoa gizarteari zabaldu nahi dio, “ekimenak kontrastatzeko eta proiektuak herritarrekin partekatzeko”. Larunbateko agerraldian, Peñak defendatu zuen “gero eta gehiago zabaltzen ari den indibidualismoaren aurrean, EAJk gizarte kohesioa indartzearen, komunitatea aktibatzearen eta justizia soziala babestearen aldeko apustua” egiten duela.
Jeltzaleen lehen saioa Errenteria-Oreretan izan da, baina datozen asteetarako, eskualde guztietara iritsiko den egutegia antolatu du: “Gaur Errenterian hasi gara gizarte politikekin, eta datorren astetik aurrera ekonomia sustapena, klima aldaketa, gobernantza eta euskara izango ditugu aztergai”, eutsi zuen Peonek. “Gure proiektuak, gure ikuspegia eta proposamen zehatzak partekatu nahi ditu, horien inguruko ekarpenak jaso, gure proiektua sendotu eta aberasteko”, gehitu zuen Tolosako alkateak.
Hori dela eta, larunbateko saiorako gizarte arloko adituak gonbidatu zituzten, “haien iritzia ezagutzeko eta ekarpenak jasotzeko. Baita bertaratu direnenak ere, gizarte eragile eta gizarte zerbitzuen arloko profesionalak gehienak”. Horrez gain, Peñak datozen urteetarako gizarte arloan dituen erronkak azaldu zituen, eta Gipuzkoako gizarte politiken ereduaren oinarrietan sakondu zen, “pertsonen zerbitzura” dagoena eta “gero eta berdinagoa, kohesionatuagoa eta solidarioagoa” dena.