Duintasunak batzarra egingo du ostiralean, Mendiburu 14 hizpide
Eraikin balioanitzan egongo den adinekoentzako txokoari buruzko informazioa emango dute, eta haren kudeaketari buruz arituko dira.
Mendiburu 14 eraikinean adinekoentzako lokala egingo dute.
Duintasun elkarteak batzarra deitu du datorren ostiralerako, hilak 24. Oiartzungo pentsionista eta jubilatuekin hitzordua jarri dute, Manuel Lekuona bibliotekan, 18:00etan hasita.
Mendiburu 14 eraikin berria izango dute hizpide. Izan ere, kultur aretoa eta euskalgintzaren bulegoen aterpe izateaz gain, adinekoentzako txokoa izango du, toki berean zegoen Gazte Izanak elkartearen ondorengo.
Txoko hori diseinatzeko parte-hartze prozesua abiarazi du udalak. Duintasunaren arabera, “oso garrantzitsua” da parte-hartzea.
Lau puntuko gai zerrenda jorratuko dute, beraz, ostiral arratsaldeko bileran:
- Kultur-etxea adinekoei zuzendutako egoitza berriari buruzko informazioa lantzea.
- Udalak irekitako prozesu parte-hartzaileari buruzko azalpenak ematea.
- Proiektuaren kudeaketa eta funtzionamendua lantzea.
- Galdera eta erantzunak.
