Aitortza ekitaldiak eta akelarrea, Martxoaren 8rako
Oiartzungo Feministen Asanbladak Emakumeen Nazioarteko Egunerako egitaraua aurkeztu du. Arratsaldeko ekitaldian zentralizatuko dute eguna.
2020ko Martxoaren 8ko irudia. Oiartzungo Feministen Asanbladak Martxoaren 8rako egitaraua aurkeztu du. Aurten ez da greba edota geldialdirako deialdirik egon, eta egitaraua egun guztikoa izan beharrean, arratsaldera mugatuko da.
Mugatu hitza kakotx artean idatzi behar da, mobilizazio indartsu bat antolatu dutelako. Lehendabizi, manifestazioa egingo dute herritik zehar, plazan hasita, 18:00etan. Hainbat geldialdi egingo dituzte: osasun etxean, Hipatiaren Lorategian, labaderoan, Madalensoro pilotalekuan eta bibliotekan.
Hainbat emakumeri aitortza egiteko baliatu dituzte geldialdi horiek, hainbat alorretan bidea urratu dutenak edo urratzen ari direnak.
Manifestazioa hasiko den toki berean bukatuko da —plazan—, eta han akelarrea egingo dutela jakinarazi dute. “Akelarrean beldurrak erre eta aliantzak sortzeko unea da”, iragarri dute.
