Eskola Kirola eta Arraztalorentzako diru laguntzak onartu dituzte
Otsaileko udalbatzarra egin dute, hamar puntukoa. Azkar joan da plenoa, eta bozketa guztietan aho batez onartu dituzte gaiak.
Aho batez onartu zituzten puntu guztiak. Oiartzungo udalbatzak otsailari dagokion ohiko plenoa egin zuen atzo. Diru laguntzak izan ziren gai nagusiak. Modu horretan, Eskola Kirol, Eskola Pilota, Muittu eta eskola orduetatik kanpoko kirol jardueretarako diru laguntzak onartu zituzten, aho batez.
Haurtzaro Ikastolari 34.900 euro bideratuko dizkiote —ikasle kopuruarengatik—. Elizalde Herri Eskolak, berriz, 20.080 euro jasoko ditu.
Bestalde, udala eta Arraztaloren lau urteko hitzarmenaren 2022ko ordainketa izan zuten hizpide. Desgaitasun fisikoa duten pertsonen senideen lkarteari 53.000 euro bideratuko dizkiote aurten, bere lanean jarrai dezan (baratzeko langileak, kontsumo taldea, enplegu zentro berezia, ikastetxeetara bisitak…).
Udal eraikinen garbiketa kontratua ere esleitu zuten, Impacto enpresari. Horrez gain, Lanbarren industriagunearen suteen kontrako protokoloa ere izan zuten hizpide.
