EH Bildu: 'Jaizkibelgo ura Añarberi emateko erabakia erdi ezkutuan hartu da'
Asteazkeneko gertakariak salatu ditu udal taldeak. Hartutako erabakiaren aurrean, egin zituen hiru proposamenak atzera bota izana arbuiatu du.
Asteazkeneko Osoko Bilkurako gertakariak salatu ditu EH Bilduk. Ohar baten bidez, Lezoko EH Bilduren udal taldeak asteazkeneko udaleko Osoko Bilkurako gertakariak arbuiatu ditu. PSE-EE eta EAJko zinegotziek Jaizkibelgo ura Añarbe enpresari oparitzea egotzi dio gobernu taldeari. Izan ere, EH Bilduko ordezkarien arabera “kalitate handiko ondasuna” izan du orain artean Lezok.
Aurrerantzean, ordea, Lezoko uren kudeaketaren gaineko eskumenen % 100a Añarbe enpresaren gain egongo da. Horrela erabaki zuten asteazkeneko Osoko Bilkuran, EAJ eta PSE-EEko zinegotzien babesarekin. Erabaki horren aurrean, hiru proposamen egin zituen EH Bilduren udal taldeak, baina gobernu taldeak hiruak gutxietsi izana salatu du, gaiak duen garrantziaren aurrean. Hiru proposamenak hurrengoak ziren: batetik, herriarena den ura Añarberen esku uzten duen hitzarmena bertan behera uztea; bestetik, Lezorenak diren ur eta azpiegiturak berreskuratzeko aukera erreala gehitzea hitzarmenean; eta azkenik, hitzarmena herritarrei azaldu eta erabakitzeko aukera luzatzea, aldaketarik egiteko ezintasunaren aurrean.
Hortaz guztiaz gain, edukiera kontuen aitzakipean Lezoko alkateak zenbait herritarrei bileran sartzea debekatu izana ere salatu du EH Bilduk. Hau horrela, erabakia hartzeko prozesu osoa herritarren bizkarretara egin dela salatu du koalizioak.
