Velascoko babes ofizialeko etxebizitzen zozketaren emaitzak
Udalak argitara atera ditu joan den asteazkenean egindako zozketaren emaitzak. Esleipenak behin-behinekoak dira, Etxebidek onetsi behar ditu.
Babes ofizialeko 39 etxebizitza eraikiko dituzte lursailean. Bizitokiek badituzte behin-behineko jabeak. 
San Pedroko Velasco eremuko babes ofizialeko etxebizitzen zozketako emaitzak argitara atera ditu Pasaiako Udalak. Aurreikusi bezala, izen-abizenak lau multzotan banatu dituzte.
Lehen taldeko etxeak mugikortasun mugatua duten pasaitarrentzat daude erreserbatua (zerrendako lehen biak dira onuradunak); bigarren taldea 1986 urtean edo ondoren jaiotakoena da (zerrenda horretako lehen hemeretziei bi logelako etxebizitzak esleitu dizkiete); hirugarren taldea, berriz, hiru logelako etxebizitzak eskatu zituztenena da, eta bertatik 11 izen aterako dira; gainontzeko etxebizitzak eskatzaile guztien artean zozketatu dira (4. taldea).
Loreto Osa Hirigintza zinegotziak argi utzi nahi izan du Pasaiako Udalak argitara ateratako zerrenda behin-behinekoa dela, “lehenengo baheketa bat” besterik ez baitute egin udal langileek, eta Etxebide izango da, oraindik aurrera, onuradunek zehaztutako baldintzak betetzen dituzten, edo ez, egiaztatu beharko duena. Azken organo hori arduratuko da behin-betiko izen-abizenak emateaz eta onuradunei emaitzaren berri emateaz.
Hemen klik eginda ikus daiteke udalak egindako zozketaren zerrenda.
