Zinegoak-eko film onenak, Oiartzunen ikusgai
Hilaren 10ean eta 11n Bilboko Gaylesbitrans nazioarteko zinema eta arte eszenikoen jaialdiko iazko eta aurtengo film onenak emango dituzte.
‘Nudo mixteco’ filmaren fotograma bat.
Zinegoak, Bilboko gaylesbitrans nazioarteko zinema eta arte eszenikoen jaialdia datorren astelehenean bukatuko da. Aste horretan bertan, film laburren sailean parte hartzen ari diren lan onenak eta iaz Publikoaren saria jaso zuen filma Oiartzunen ikusteko aukera izango da.
Bi saiotan banatu dituzte filmen emanaldiak. Hilaren 10ean (osteguna) eta 11n (ostirala) izango dira emanaldiak, dohainik, udaletxeko areto nagusian (19:00etan, bi kasuetan).
Osteguneko saioan sei film labur ikusteko aukera egongo dela jakinarazi dute. Honakoak izango dira: Les filles ne marchent pas seules la nuit; Elsa; 17 minutos con Nora; No deberías; Berak baleki eta To the future, with love.
Ostiralean, aldiz, film luze bat emango da: Angeles Cruz zuzendari mexikarraren Nudo mixteco. Lehenengo aldiz emango da Oiartzunen Zinegoak-en erakutsitako film luze bat.
Jatorrizko hizkuntzan emango dituzte, euskarazko azpitituluekin.
