Errenteriako Udalak gerraren aurkako adierazpena onartu du
Ukrainarekin elkartasuna adierazi eta Errusiari erasoak eteteko eskatzea onartu du udalak. Larrialdi Humanitariorako diru-laguntza ere onartu du.
Atzo Ukrainaren alde eta gerraren aurka kontzentratu ziren errenteriarrak. Errenteriako Udalak Errusiako Federazioak Ukrainan egindako ekintza militarrak gogor gaitzetsi ditu. Errusiako Gobernuaren erasoa Ukrainaren aurka larria eta justifikaziorik gabekoa dela uste du instituzioak.
Borrokak berehala gelditzeko eskatu du, eta armada errusiarrari Ukrainatik erabat erretiratzeko eskatu dio. Bide batez, Ukrainari erabateko elkartasuna adierazi nahi izan dio udalak azken egunetan egondako hildakoengatik eta zaurituengatik. Bestetik, Europar Batasunari kudeaketa diplomatikoaren bitartez deseskalatze prozesu bat bultzatzeko eskatu dio.
Gaztelutxoko aterpetxea Ukrainatik etortzen diren errefuxiatuei babesa emateko proposamena egin du Errenteriako Udalak. Azkenik, bertan lanean dagoen erakunde batentzat ere Larrialdi Humanitariorako diru-laguntza onartu du.
