Intxaurrondoak memoriaren fruitua emango du
Hilaren 19an ekitaldia egingo dute bigarren aldiz, Abaraxka ludotekak antolatuta, hildakoak gogorarazteko. Herritar guztiei zuzendutakoa da, eta proposamenak biltzen ari dira.
Hilaren 19an intxaurrondoaren bueltan elkartuko dira berriro. Oiartzuarrek badute hildakoak gogorarazteko txokoa. Ibargain parkean dago, eta intxaurrondo batek sinbolizatzen du. Iazko martxoan landatu zuten, Abaraxka udal ludotekak Pirritx, Porrotx eta Marimotots pailazoen enkargua jaso eta hari erantzunez. Aurten bigarren aldiz egin nahi dute ekitaldia.
Iazko ekitaldirako oiartzuarren proposamenak jaso zituzten. Abaraxkako Nekane Martiarenak gogorarazi duenez, herritarren erabakiz landatu zuten intxaurrondo ernamuina Ibargainen, eta oiartzuar batek Agur jaunak jo zuen eskusoinuarekin. Lur Kortak ipuinak kontatu zituen, herritarrek proposatuta.
Orain bide berbera hartu dutela jakinarazi du Martiarenak. «Urtebete pasatu da ordutik, eta pentsatu dugu gauza bera egin behar dugula. Aurten ere bai pentsatu dugu jendearen ideiak biltzea». Hilaren 10era are ideiak jasoko dituzte (ikus galdetegia hemen). Hainbat galderari erantzun beharko diote: zer den ikusi nahi dutena, betetzen dutenek ere modu aktiboan parte hartu nahi duten, zerbait eskaini nahi duten, edo zein musika entzun nahi duten besteak beste.
«Gure helburua da urtero horrelako zerbait egitea, gure hilak oroitzea, modu alai, goxo eta xume batez. Bakoitzak gure dolua, eta heriotzaren prozesua modu diferente batean bizi dugu», nabarmendu du.
Horretarako, herritarren parte hartzea sustatu nahi dute, eta proiektua ludotekaren komunitatetik harago zabaldu. «Intxaurrondoarena ez da Abaraxkako haur eta gurasoena bakarrik. Abaraxka herriaren parte da, eta garrantzitsua da herriarekin bat egitea». Iaz jende «oso ezberdina» batu zela gogorarazi du Martiarenak.
Intxaurrondoa, ongi zainduta
Intxaurrondo bisitatzea ez da urteko egun batera mugatuko. Uztaileko udalekuetan parkera joan ziren, eta ikasturteak irauten duen bitartean, ludotekako haurrekin txango txikiak egin dituzte, eta egingo dituzte.
Hilaren 19koa deialdi irekia denez, herritarrak animatu dituzte «elkarrekin, giro goxo batean eta komunitatean» hildakoak gogoraraztea. Memoriaren intxaurrondoaren fruituak ustelduko ez direlako.
