Inudeei buruzko erakusketa Jantziaren Zentroan
Erakusketa bihar hasi, eta apirilaren 30era arte luzatuko da. Bisita komentatuak ere egongo dira.
Inudeei buruzko erakusketa Kapitain Etxean. Errenteria-Oreretako Jantziaren Zentroko hurrengo erakusketaren protagonistak inudeak izango dira. Inudeen jantziak 1881-1920 urte bitartekoak, eta Donostia, Azpeitia eta Bizkaiko argazkien bitartez egindako erreplikak dira. Jatorrizko 15 argazkiak ikusgai egongo dira paretan zintzilik.
Inudeen atzean Donostiako Kontxako pasealekuaren irudi handia ikusi ahal izango dute bisitariek. Donostiako San Telmo museoko bildumatik aterata dago, eta tamaina handian inprimatu ahal izateko museoak argazkiaren negatiboa helarazi behar izan dio Jantziaren Zentroari.
Bestetik, ohikoa izaten den bezala, bisita komentatuak antolatu dituzte. Bisitek 30 minutuko iraupena izango dute, eta doakoak izango dira. Martxoaren 8an arratsaldeko 17:30ean gazteleraz, 18:00etan euskaraz eta 18:30ean gazteleraz berriro. Martxoaren 12an, larunbatean, 20:00etan izango da euskarazko bisita; gaztelerazkoa, aldiz, 20:30ean.
Aldez aurretik izena ematea beharrezkoa da bisita komentatuetan. Taldeak 15 lagunekoak izango dira asko jota. Errenteriako turismo bulegora deitu daiteke (943 49 45 21) edo posta bat idatziz hemen klik eginez.
Erakusketa martxoaren 5etik apirilaren 30era arte egongo da zabalik. Larunbatetan 11:00etatik 14:00etara arte, eta 17:00etatik 20:00etara arte egongo da irekita. Igandetan eta jai egunetan, berriz, 11:00etatik 14:00etara.
