COVID funtsak "oinarrizko proiektuetan" erabiliko direla kritikatu du PSE-EEk
Alkatearen eta udal gobernuaren jarrera salatu dute Errenteria-Oreretako sozialistek.
Isaac Palencia, Errenteria-Oreretako PSE-EEko bozeramalea. Errenteriako Udalak pandemiari aurre egiteko jasotako dirua udaleko proiektu arruntetarako erabiliko direla salatu du Isaac Palencia PSE-EEko bozeramaleak. Gipuzkoako Foru Aldundiak udalei transferitu dien 25,1 milioietatik 1.337.000 euro Errenteria-Oreretarentzat izan dira.
Talde sozialista kezkatuta ageri da funtsei emango zaien erabilpenagatik, eta gogorarazi dute albistearen berri izan zuten lehenengo momentutik udal gobernuari eskua luzatu ziotela, denen artean pandemiak eragindako kalte ekonomikoari aurre egin ahal izateko.
Alkateak gaiaren inguruan erakutsitako “prestutasun eza” kritikatu dute sozialistek, eta taldeak egindako proposamenak atzera botatzea leporatzen diote. PSE-EEk ekarpen ezberdinak egin zituen COVID funtsen banaketa egiteko garaian, horien artean: merkataritza eta ostalaritza bultzatzeko estrategiak indartzea; online plataforma bat sortzea tokian tokiko merkatariek euren salmentak egiteko formazio programa eta merkataritzarako, ostalaritzarako eta enpresa txiki eta ertainentzako laguntzak martxan jartzea; kulturarako eta eskolarako erosketak egiteko bonuak banatzea; liburutegiko funtserako ez ohiko erosketa egitea eta digitalizazioa eta enpresa-sorkuntza abian jartzeko politika berriak burutzea.
Hortaz aparte, birgaitzetarako laguntzak udalerri osoari zabaltzea eskatu du PSE-EEk. Egun, diru laguntza horiek Errenteria-Oreretako alde zaharrean bizi direnentzako daude mugatuak.
Palenciaren esanetan “bizi dugun egoera ez ohikoa” da, eta jasotako diru laguntzak beharrezkoak dira susperraldi ekonomikoa bultzatzeko.
