Ibilbideak aitortu dituzten Mariasun Landa sariak banatu dituzte
Goiatz Labandibar eta Eli Etxabeguren izan dira irabazleak, baina Maria Jesus Aranburuk aitortza jaso du ere.
Goiatz Labandibar Arbelaitz eta Maria Jesus Aranburu Arbelaitz. Hirian historia egin duten –eta egiten dabiltzan– Errenteria-Oreretako emakumeak aitortzen dituen idazlanen XIII. Mariasun Landa sarien banaketa egin dute gaur goizean Emakumeen Etxean. Bereziki, emandako urratsak aitortu nahi dituzte, eta lortu dutela uste du Berdintasun Sailak.
Urtero lez, bi sari banatu dituzte; batetik, ‘Emakumezkoen begirada’ izenekoa, eta bestetik Emakumeei begirada. Lehena Eli Etxabeguren Aranzabalek irabazi du, Maika Tameronen ibilbidea paperera eramateagatik. Bigarrena, aldiz, Goiatz Labandibar Arbelaitzek, Aizateko sasi eskola eta bertan irakasle izandako Maria Jesus Aranburu Arbelaitzen historia berreskuratzeagatik.
Tameron, Galiziatik etorritako familia batean hazi zen, eta Errenterian bizi zela, haur parke baten beharra izan zen kaleratu zuen lehen aldarria. Hurrengo urratsa, barrura begira egin zuen, eta euskara bereganatu zuen.
Ondoren, ezaguna egin zion borrokan hasi zen: arraunean. Hibaika Arraun Elkartean sartu zen, eta guztiz eraldatu zuen arraunaren ikuspegia. Herrian arraunarekiko grina piztu zuen, eta emakumeei tokia emateko bidean oinarriak ezarri. Ildo horretan, Emakumezkoen traineru elkartea sortu zuen ere. Tameronen hitzak ekarri dituzte gaurko saiora: “Badira gure desirak ez betetzea baino zerbait okerragoa, desiratzeari uztea”.
Etxabegurenek ezin izan du bertaratu, eta bere amak saria jaso duen arren, bideo baten bidez eskertu egin du garaikurra. Bere familia, lagun eta ingurukoei esker bereziak eman dizkie: “Bidelagunik gabe prozesu horiek ez ziren bizi ditudan bezain kolektiboak izango”. Etxabegurenek emozioetatik idazten hasteko prozesua martxan jarri zuela azaldu du, eta sari hauek horretan lagundu diotela aitortu du.
Bigarrenik, Aizate baserriko sasi eskolako sasi-maistrak eta sasi-eskolak izan ditu hizpide Labandibarrek bere kontakizunean. Sari banaketa hunkigarria izan da, Aranburu eta Labandibarrekin batera, Aranbururen hiru ikasle joan direlako. Garai hartako egunerokotasuneko zertzelada batzuk emateko probestu dute aukera.
Aranburuk azaldu du bertan lanean hasi zenean jakitun zela haiena ez zela beste eskolak bezalakoa. Labandibarrek egindako ikerketak “eskola nolakoa zen gehiago ikasteko gogoa piztu” diola adierazi du irakasle izandakoak, eta lehen momentutik informazioa erantsi nahi izan du: sasi-eskolako ikasleak zetozen 24 baserriak zerrendatu ditu.
Goiatz Labandibar, Mariasun Landa, Aizpea Otaegi Errenteriako alkatea, Aranbururen bi ikasle, Maria Jesus Aranburu, eta bere beste ikasle bat.
Eli Etxabegurenen ama, Aizpea Otaegi alkatea, Mariasun Landa, Goiatz Labandibar eta Maria Jesus Aranburu.
