Lau Haizetarak bat egin du Errigorarekin
Kontsumitzeko erak aldatzeko bide bat proposatzea du xede kanpainak. Produktuak martxoaren 30era arte eskatu ahal izango dira, eta Lau Haizetarako egoitzan jaso daitezke.
Lau Haizetarak bat egin du Errigoraren kanpainarekin. Lau Haizetara Euskaltzaleon Topaguneak bat egin du Errigoraren ‘Nafar Hegoaldeko uzta eskutik eskura’ kanpainarekin, kontsumitzeko erak aldatzeko bide bat proposatzen duen proiektuarekin. Egitasmo hori abian da jada, eta martxoaren 30era arte egongo da eskuragarri. Interesdunek Errigorako produktuak online eskatu eta Lau Haizetarako egoitzan jaso ditzakete. Bertan oliba-olio birjina estra eta kontserba, arroz, pasta eta lekale sortak eskatu ahal izango dituzte, euskaraz etiketatuta eta ekoizlearen jatorrizko prezioan.
Lau Haizetaratik zehaztu dute “elikadura osasungarri eta burujabe baten kanpaina bat sustatzeko, nekazarientzako prezio justuak dituzten pertsonen artean auzolanean esperientziak lantzeko eta Nafarroan euskara sustatzeko, Euskal Herriaren nortasuna landuz, kanpaina zirraragarri” batean murgildu direla.
Topagunetik azaldu dute “ilusio eta pasio handiagoz” heltzen diotela proiektuari, “eraikitzen ari garen diziplina anitzeko proiektu batetik gure burua berrantolatzeko eta Errenteria-Oreretako pertsona eta komunitate euskaldun gisa berrasmatzeko”.
Kanpaina hori “berezia” dela aipatu dute Lau Haizetarako kideek, “berritu” nahi dugulako, eta “azken bederatzi urteetan iritsi ez garen tokiak esperimentatu” nahi ditugulako. Hori dela eta herritarrak proiektuan parte hartzera gonbidatu dituzte, “Nafarroako erriberako lehen sektoreari laguntzeko eta Euskal Herria batuago bat egiteko”.
