Igandeko martxan parte hartzeko deia egin du Ezker Anitza-IUk
Arrazakeriaren eta xenofobiaren aurka kaleak hartzera deitu du koalizioak. Trintxerpeko azokatik abiatuko dira igande goizean.
Martxaren aurkezpena, Irun eta Hendaia lotzen dituen Etorbidearen zubian. 
Pasaiako Ezker Anitza-IUk dei egin die herritarrei Arrazakeriaren eta Xenofobiaren Kontrako XXV. Martxan parte har dezaten. Bide horri igandean ekingo diote, 11:30ean, Trintxerpeko Azokatik.
Mobilizazioa SOS Arrazakeriak, Medicus Mundi Gipuzkoak eta Euskadiko GGKEen Koordinakundeak deitu dute, Irun-Hendaia mugan egindako kontrol selektiboa salatzeko. Pasaiako koalizio politikoak salatu du “arrazaren arabera egiten diren legez kanpoko” kontrol horiek talka egiten dutela Europar Batasunaren legediarekin, hau da, pertsonen joan-etorri askea ahalbidetzen duen legeriarekin.
Ildo horretan, gaitzespen garbia egin du Ezker Anitzak: “Ezaugarri fisiko zehatzak izate hutsa ez da arrazoia poliziak inor identifikatzeko ez mugan ez Irungo topoan, non horrelako kontrolak ere detektatuta dauden”. Are: “Frantziak ezarri duen legez kanpoko muga horren ondorioz, Bidasoa ibaia igerian zeharkatzen saiatzen ari diren gizon gazteak hiltzen ari dira, Europako beste herrialde batzuetarako bidean jarraitzeko. Hori dela eta, kontrol horiek berehala amaitu behar dira”.
Ezker Anitza-IUk giza korridore seguruak ezartzea exijitu ditu beren herrialdeak uztera behartuta dauden pertsona guztientzat, bizitza duin eta seguru baten bila, indarkeriazko gatazketatik, goseteetatik edo krisi klimatikoetatik ihesi.
