Gure Eskuk 'Pirinioetako bidea' egitasmoa aurkeztu du
Egitasmoa uztailaren 2an burutuko da, eta gaur goizean egin den agerraldian, proiektuko xehetasunak eta Oarsoaldeko herritarrek argituko dituzten gainak zeintzuk diren zehaztu dute.
'Pirinioetako bidea' egitasmoaren aurkezpena. Gure Eskuk, Kataluniako hainbat eragilerekin batera, egitasmo berri bat jarri du martxan datorren uztailaren 2rako: Pirinioetako bidea. Proiektu horren baitan 300 gailur baino gehiago argiztatuko dira, Hondarribiko Higer lurmuturretik Creusera, Euskal Herria eta Katalunia batuz, bi herrien autodeterminazio eskubidea aldarrikatzeko eta nazioarteko komunitateari mezua helarazteko. Egitasmoaren nondik norakoak eta xehetasunak azaldu dituzte gaur goizean Niessen aretoan, Amalur Alvarez Gure Eskuko bozeramaileak eta plataformako hainbat kidek.
Euskal Herrian 115 tontor argituko dira guztira, eta Oarsoaldeko herritarrek zehaztuta dituzte jada argituko dituzten gainak. Pasaitarrak eta lezoarrak Jaizkibelera bideratuko dituzte; errenteriarrak Zariara igoko dira; eta oiartzuarrak Errenga eta Bianditz mendietan izango dira.
Argituko diren tontor guztiak bi multzotan sailkatu dituzte: gailur berdeen taldea eta gorriena. Gailur berdeek ez dute aparteko zailtasunik, eta jende gehienarentzat dira irisgarri. Aurrez aipatutako Jaizkibel, Zaria, Errenga eta Bianditz tontor berdeetan sailkatu dituzte, eta mendi horietara joateko izen emateak irekita daude jada.
Horrez gain, antolatzaileek gailur gorrien bidez izendatu dituzte tontor batzuk, mendizale trebatuei bideratu dizkietenak. Horien artean izendatu dute Aiako Harriak. Mendi horietara joateko espedizio taldeak osatuko dituzte, eta izen emateak pirinioetakobidea@gureeskudago.eus helbide elektronikoan egin behar dira.
Egitasmoan parte hartzeko izen ematea hamar eurokoa da. Bost euro ekimeneko gastuetara bideratuko dira, eta beste bost euroak istripu eta erreskateetarako asegurua estaltzeko, izan ere, gailurretako jaitsiera ilunpean egingo da, eta arriskua egon daiteke. Gainera, antolatzaileek zehaztu dute, federatuta dauden parte hartzaileek soilik ekimeneko bost euroak ordaindu beharko dituztela. Gailur horietara igotzeko, plataformako kideek aipatu dute herrietatik autobusak jarriko dituztela.
Mendietara joan ezin duen jendeari ere aukerak eta alternatibak ematen saiatuko dira Gure Eskutik. Kideek eutsi dute herri osoak izan behar duela egitasmo kolektibo eta parte hartzailearen helburu. Horretarako, bi elementu izango dituzte kontuan: batetik, mendiak argitzen diren momentu berean herriko lekuren bat argiztatzea eskatu dute; eta, bestetik, argiztatze momentu horretan ‘Txoriak Txori’ kantua abestea.
Proiektua antolatzen hasi dira dagoeneko, eta egitasmoa planifikatzen jarraitzeko herritarrei deia egin diete plataformako kideek. Hori dela eta, datozen egunetan egingo diren batzar eta deialdiei adi egotea eskatu diete bertaratu direnei.
