Hildakoak omentzeko ekitaldia egin du Abaraxka ludotekak
Iaz zuhaixka landatu zuten. Aurten, loreak landatu, antzerki laburra, dantza eta bestelakoak egin dituzte.
Abaraxka Ludotekako umeak landareak landatzen. Abaraxka ludotekak, iazko ekitaldiari jarraipena emateko asmoz, hildakoei omenaldia egin du gaur arratsaldean Oiartzungo Ibargain parkean. Ludotekatik abiatu dira umeak parkera. Batzuk, joaldunez jantzita, joareak joz. Beste batzuk, ordea, loreak landatzeko beharrezkoa zuten ura eramaten zuten pitxarra txikietan. Animatuenak, erraldoiak hartu dituzte giroa alaitzeko asmoz. Denak batera, ludotekatik Ibargain parkera abiatu dira bostak pasata zirenean.
Behin denak parkean zirela, bi umeek hitz batzuk eskaini dizkiete azken urtean zendu diren pertsona guztiei. Jarraian, ekitaldira bertaratu diren gurasoei eta gainontzeko umeei deia luzatu diete albo batean prest zegoen materialarekin nahi zutena idazteko edo marrazteko. Hildakoei hitzak eskaini ondoren, aurreskua dantzatu dute iaz landatutako zuhaitzaren ondoan.
Azkenik, kolore ezberdinetako loreak landatu dituzte iazko zuhaitzaren ondoan. Ekitaldiari amaiera emateko, antzerki laburra eskaini diete umeek bertaratutako gurasoei eta gainontzeko herritarrei.
