Lezokuak bildumaren laugarren liburua aurkeztu dute
Gezala Auditoriumean egindako aurkezpenean liburuan parte hartu duten pertsonek hitz egin dute.
Gezalan egindako aurkezpena. Ezkerretik hasita: Jose Luis Agirretxe (hizkuntza ikuskaritza eta aholkularitza), Lander Zurutuza (marrazkilaria), Mikel Susperregi (testuen idazlea), Garazi Ugalde (abestiaren letraren sortzailea) eta Iñaki Labaka (abestiaren doinuaren sortzailea). Lezoko Gezala Auditoriumean aurkeztu dute Lezokuak bildumaren laugarren liburua, goizeko hamabiak pasatxo zirenean. Bertara gerturatu diren lezoarrek liburuan parte hartu duten pertsonen hitzak entzuteko aukera izan dute. Laugarren liburu ilustratua da gaur aurkeztu dutena, eta Esklaboen barrakoiak du titulutzat.
Bertan, Lezon jazotako lan behartuen eta trabajadore horien bizi baldintzen berri ematen da. Hortaz aparte, herriko emakumeek arropak garbitzen, josten eta soberan zuten janari eskasa emanez presoei eskainitako laguntza ere agerian geratzen da liburuan.
Hizlariek hitza hartu baino lehenago, Lezoko Udaleko Kultura zinegotzia den Ion Pombarrek hitz egin du, liburuan bere ekarpena egin duten guztiei eskerrak emateko. Jarraian, hizkuntza ikuskaritza eta aholkularitza lanak egin dituen Jose Luis Agirretxek liburuaren nondik norakoak aipatu ditu. Liburuaren helburua frankismoak mendekuz presoei ezartzen zitzaien zigor krudelaren berri ematea adierazi du. Bide horretan, Lezoko herritarrek, kasu askotan, andreek, preso horiei ematen zieten laguntza eta elkartasuna ere islatuta dagoela jakitera eman du Agirretxek.
Lander Zurutuza liburuak dituen marrazkietaz arduratu da. Liburua irakurtzeko gonbita luzatu die lezoarrei, batez ere gazteei, bere esanetan liburuak ondo laburbiltzen duelako herrian eta etxeetan gertatutakoaren tragedia.
Bestetik, Mikel Susperregi testuaren sortzaileak ipuin ilustratua irakurtzeko oso erraza dela gogorarazi du, eta 30 minututan dena jarraian irakurtzeko gomendioa egin du. Berarekin lanean ibili direnei ere eskerrak eman dizkie.
Azkenik, bideokliparen egileek hitz egin dute. Alde batetik, Garazi Ugalde, abestiaren letra idatzi duenak; eta bestetik, Iñaki Labakak, idatzitakoari doinua jarri dionak. Lehenengoak, liburuan aipatzen diren emakumeei aurpegia jartzea eta erakutsi zuten elkartasunari ahotsa ematea beharrezkoa zela azpimarratu du. Bigarrenak proiektu honetan bizi izan duen esperientzia izugarria aipatu du, eta eskerrak eman dizkie bideoklipean parte hartu duten guztiei.
Aurkezpena amaitu ostean, grabatutako bideoklipa emititu dute. Jarraian ikusi dezakezu bideoklipa.
