Maixabel Arretxek jaso du lehen Amalur Saria
Ekoizle errenteriarrak 30 urte eman ditu bere elikagaiak azokan saltzen. Labore Oarsotik bere ibilbidea eta beste hainbat emakume baserritarrena aitortu nahi izan dute.
Maixabel Arretxe Sarasola izan da Amalur Sarien omendua. Labore Oarsok lehen aldiz eman ditu Amalur Sariak gaur goizean. Omendua Maixabel Arretxe Sarasola errenteriarra izan da, 30 urtez baratzak eman diona azokan saltzen ibili den emakume ekoizlea. Gaurkoa izan da lehen saria, baina Laboretik zehaztu dute urteroko sari bihurtu nahi dutela honakoa. Sarien izenak dioen bezala, ama, emea, emakumea eta lurra dira sari horien bidez omendu nahi dituztenak.
Laboretik lantzen ari diren proposamena “elikadura burujabetzaren alde lan egitekoa” dela nabarmendu dute, “bertan ekoizten eta bertan kontsumitzen” denarekin zerikusia duena. Laboreren ekarpena eta aberastasuna da “kontsumo indibidual bat izatetik kolektibo izatera pasatzeko ahaleginean” dabilena, “bazkidetza sustatuz eta elkarlaguntza sistemak asmatuz”.
Gaur egungo elikadura sistema nagusien aurretik, hau da, multinazional eta supermerkatuak iritsi aurretik, “gure herriak oso bizirik” zeudela eutsi dute Laboreko kideek, eta “denda txikiek eta azokek bizitasunaz gain, herriari kolorea ematen” ziotela baietsi dute. Orain, baina, kontsumo ohiturak aldatu dira, eta Laborekoek aipatu dute ” gaur egun garrantzia handiagoa ematen diogula begitatik sartzen denari ahotik sartzen denari baino”. Hori dela eta, “baserritarrek gero eta zailtasun handiagoak dituzte beren ekoizpenak merkatuan defendatzeko”, zehaztu dute.
Horregatik guztiagatik, “zailtasunak zailtasun, gertuko ekonomia honetan sinetsi ez ezik inurri bat bezala bere bizitza osoa azokan eman duen Maixabel Artetxe Sarasola eskertu eta omendu” nahi dutela azaldu dute Laboreko kideek. Zehaztu dute Arretxek beti izan duela baratza bat inguruan, eta poliki poliki hasi zela. Hasieran bere baratzeko letxuga eta tomateak auzoko dendara eramaten zituen saltzeko. Ondoren, azokako beste emakume baten bitartez hasi zen elikagaiak saltzen. Eta, azkenik, senarrari esan zion: “Neroni joango naiz azokara postua jarri eta zuzenean saltzera”. Ordutik, 30 urtez buru belarri ibili da Artetxe baratzak eman diona saltzen azokako egun guztietan hutsik egin gabe. Arretxez gain, “beren ekoizpenak saldu izan dituzten eta saltzen dituzten baserritar emakume guztiei” aitortza egin diete Laboretik.
