Twiterreko hari batean oinarritutako filma: 'Zola'
Benetako istorio batean oinarritutako filma da 'Zola'. Zerbitzari eta stripper bat da protagonista, eta bidaia baten ezbeharrak kontatzen ditu 148 tweet-eko hari batean.
'Zola' filma proiektatuko dute gaur Niessenen. Martxoaren 8ko egitarauaren barruan sartutako proiekzio batekin dator OzZinema gaur: ‘Zola’. Twiterreko hari batean oinarritutako gidoia duen lehen filma da. Ipar Amerikako zinema independentearen barruan jaioa, Janicza Bravo zuzendari estatubatuarraren filmak ospe handia lortu zuen Sundance Zinemaldian, eta, duela gutxi, emakumezko aktore onenaren saria irabazi zuen Independent Spirit sarietan.
Proiekzio hori OzZinema eta Bartzelonako Americana Film Fest zinema jaialdiaren arteko elkarlanaren barruan kokatzen da, eta filma Espainiako areto komertzial baten barruan emango den lehen proiekzioa da.
Zola Detroiteko zerbitzari bat da, eta Stefani bezeroaren lagun egiten da. Stefanik Floridan parranda asteburu bat pasatzera gonbidatzen dio. Hasieran plan dibertigarria dirudiena krimen eta prostituzio istorio bizi eta zoro bihurtuko da. Zolak dena Twitterreko hari batean kontatu eta biral bihurtu zen.
2015ean A’Ziah ‘Zola’ King izeneko zerbitzari eta stripper estatubatuar batek 148 tweet-eko hari korapilatsu bat egin zuen, Tampara egindako bidaia bateko ezbeharrak kontatzen. Sei urte geroago, Sundance 2020an, Zola filma estreinatu zen, sexuaren eta prostituzioaren azpimunduetara egindako bidaia kontatzen duena.
Zola road movie bat da, benetako istorio bat kontatzen duena. Taylour Paige eta Riley Keough protagonistek kimika handia aurkezten dute pantailan, eta beren talentu guztia azaleratzen dute indarkeria, krimen eta prostituzio zurrunbilo batean sartuta dauden emakume berezi horiek aukera asko ukatu zizkien eta marjinalitatera bultzatu zituen gizarte baten biktima gisa interpretatzeko.
‘Zola’ gaur ikusi ahal izango da Niessen zinema aretoetan, 19:30ean. Sarrerak hiru bidetatik lortu ahal izango dira lau euroko prezioan: https://sarrerak.errenteria.eus/ webgunean, Lekuona Fabrikan, eta Niessen Kulturguneko leihatilan saioa baino ordubete lehenago.
