Adinekoen espazio berriari buruzko bilerak egingo dituzte auzoz auzo
Adinekoekin aritzen diren eragileak eta udala Mendiburu 14ko espazioaren erabilera diseinatzen ari dira, baina 60 urtetik gorako oiartzuarren ekarpena nahi dute.
Mendiburu 14 eraikineko erabilera diseinatzen duen talde eragilea eta adinekoekin aritzen diren eragileen ordezkariak. Mendiburu kalea eta Landetxe plazaren artean egiten ari diren udal eraikin berriaren erabilera diseinatzen ari dira. Adinekoentzako espazioa izango dena lantzen ari dira udala eta adinekoekin elkarlanean aritzen diren eragileak.
Zortzi dira guztira herriko eragile horiek: Gazte Izanak; Killirikupe; Duintasuna pentsionisten elkartea; HELTA; Torri Gukin; Bide Lagun; Petra Lekuona zaharren egoitza eta Aiton-etxe eguneko zentroa.
Hala ere, lan taldeak 60 urtetik gora dituzten oiartzuarren iritzi eta beharrak jaso nahi ditu. Horretarako, datozen bi asteetan egingo dituzte bilerak auzoz auzo. Lehenengoa Altzibarren izango da, asteartean.
“Landetxeko espazio berriak zer izan behar duen eta zein jarduera gauzatzea nahiko luketen adinekoen komunitateak berak proposatzea nahi dugu”, esan du udalak, “60 urtez goitiko oiartzuar denek eurena den tokia senti dezaten”.
Adin tarte horretan dauden oiartzuarren gutun bana helarazi die udalak, batzarretara gonbidatzeko. “Izan ere”, zehaztu dute, “euretako bakoitzaren ekarpenak eraikiko du etorkizuna”.
Bileretan parte hartzeko ez da beharrezkoa aldez aurretik izena ematea, baina jakinaraztea eskertuko luketela jakinarazi dute. Horretarako, Oiartzungo udaletxera jo, 680 497 090 telefono zenbakira deitu edo e-posta bidez idatz daiteke.
BILEREN EGUTEGIA
Martxoak 29, asteartea
- Altzibar
Tokia: Olatxo auzo lokala. Ordua: 10:00, euskaraz / 17:00etan, elebitan.
Martxoak 31, osteguna
- Ergoien, Gurutze eta Karrika
Tokia: Auzokalte elkartea (Ergoien). Ordua: 17:00, euskaraz.
Apirilak 1, ostirala
- Ugaldetxo
Tokia: Isastiko auzo lokala. Ordua: 10:00, euskaraz. - Arragua
Tokia: Aldeguna Elkartea. Ordua: 17:00etan, elebitan.
Apirilak 5, asteartea
- Iturriotz
Tokia: Argiñeneko auzo lokala. Ordua: 17:00etan, euskaraz.
Apirilak 8, ostirala
- Elizalde
Tokia: Udaletxeko areto nagusia. Ordua: 10:00etan, euskaraz / 17:00etan, elebitan.
