Gaur hasiko da tortura ardatz izango duen zikloa
Esteban Muruetagoienaren kasua hizpide izango dute solasaldi batean. Bihar torturari buruz arituko dira, eta etzi medikua zenari aitortza egingo diote.
Esteban Muruetagoienari aitortza ekitaldia egingo diote larunbatean.
Oiartzunen 1936tik aurrera egon diren urraketen lanketaren harira, torturari buruzko zikoa antolatu du udalak. Gaur hasiko da, Esteban Muruetagoiena herriko medikua izan zenaren kasua hizpide.
19:00etan izango da solasaldia. Hiru parte-hartzailek hartuko dute hitza: Tamara Muruetagoiena Estebanen alabak, Jonathan Martinez kazetariak eta Aranzadi elkarteko Javi Buces ikerlariak.
Hilaren 29an beteko dira 40 urte Esteban Muruetagoiena hil zela. Atxilotu eta bederatzi egun eman zituen inkomunikatuta, eta tortura aztarna argiak zituen askatu zutenean. Hiru egunera hil zen.
Hitzaldia eta aitortza
Biharko, berriz, torturari buruzko hitzaldia antolatu dute, Aitortu gabeko biktimak. Torturaren errealitatea izenburupean. 18:00etan hasiko da, udaletxeko pleno aretoan.
Honakoak izango dira hizlariak: Olatz Barrenetxea, psikologo klinikoa; Paco Etxeberria, mediku forentsea; eta Laura Pego, Zuzenbidean doktorea eta IVAC/EKI-ko ikerlaria. Moderatzaile lanetan Olatz Retegi antropologo eta ikerlaria arituko da.
Etzirako —larunbata— aitortza ekitaldia antolatu dute. Esteban Muruetagoiena torturaren biktima bezala aitortuko du udalak. Ordezkaritza duten bi alderdien arteko kontsentsuarekin egingo da ekitaldi hori, beste guztiak bezala. Aitortza 13:00etan hasiko da, Arizmendieneko lorategian (eguraldi txarrarekin, udaletxean; ona aurreikusi dute).
