Donbass, Ukraina eta Errusiari buruz arituko dira apirilaren 8an
'Donbass. Gerra Europaren bihotzean' dokumentala eskainiko dute Oiartzunen. Ibai Trebiño egilearekin solasean aritzeko aukera egongo da.
Ibai Trebiño egileetako bat (eskuinean), dokumentala errodatu zutenean. Hilabete pasatu da Errusiako tropak Ukrainan sartu zirenetik. Gerra, hala ere, lehenago hasi zen, estatu horren ekialdeko lurretan. Donetsk eta Luhansk eskualdeetan, zehazki.
Ibai Trebiño eta Mikel Arregi kazetariak bertan izan ziren gerra hura piztu eta hilabete gutxira, Argia aldizkariak sustatutako proiektuan. Donbass. Gerra Europaren bihotzean dokumentala errodatu zuten bertan, gatazkaren sorburua ulertzeko hainbat gako emanez.
Dokumentala ikusteko aukera egongo da apirilaren 8an, Oiartzungo pleno aretoan. 19:00etan hasiko da ikus-entzunezkoaren emanaldia, eta ondoren Trebiñeorekin solasean aritzeko aukera egongo da.
Errusian, Ukrainan eta Donbassen egun gertatzen ari dena hurbilarazten eta argitzen ahaleginduko da Trebiño.
Euskal Herria-Donbass Komiteak antolatu du saio hori.
