[Galeria] Elizalde garbiago dago, herritar talde baten ekimenari esker
Bazterrak Txukuntzen-ekoek lehen auzolana egin dute, hogei lagunen artean. Bestalde, udalak tona batetik gora jaso du ibai bazterrean.
Hogei lagunek hartu zuten parte auzolanean. Bazterrak Txukuntzen taldeak deituta, hogei lagun elkartu ziren atzo goizean plazan. Elizalde auzoa txukuntzea zuten helburu elkartu ziren 11 heldu eta bederatzi haurrek.
Auzoz egingo dituzte garbiketak, hilero, auzolanean. Datorren zita Gurutzen izango da, apirilaren 24an.
Ondoren, materiala sailkatu zuten. Jasotako hondakinen ia erdia plastikoak izan ziren, 854 objektu jasota. Atzetik zeuden metalak (%15,4; 267) eta papera eta kartoia (%10,8; 187 objektu). Egur landua, beira, maskarillak eta beste ere jaso zituzten.
200 bat erosketa poltsa jaso zituzten, baita beste hainbeste litxarrerien poltsa ere. 200 zigarrokin ere bildu zituzten.
Bazterrak Txukuntzen taldearen helburua, baina, ez da mugatuko auzoak garbitzera. Ekintza horiekin kontzientzia sortu nahi dute herritarrengan, herria txukun mantentzearen garrantzian fokua jartzeko.
Ibaitik, ia tona bat
Oiartzungo Udalak, bere aldetik, Oiartzun ibaiko bazterrak garbitu ditu azken asteetan. Zehazki, Ugaldetxo eta Iturriotz artean 605,54 kilo hondakin bildu ditu Urzainek. Urtarriletik hona, guztira, 1.054 kilo hondakin jaso dituzte ibaiaren ibilgutik.
Atamitx eta Makutsoko zubien arteko ibilguan gisa guztietako hondakinak jaso direla esan du udalak. “Tartean”, zehaztu dute, “kale hondakinak (plastikoa, latak, musukoak, toallatxoak…), obra hondakinak, baita bizikleta bat ere”.
