ABB-Niesseneko ELAk esan du ez duela aurreakordioa babestuko
LAB eta UGTk enpresarekin hitzartutako hitzarmenaren aurreakordioarekin ez du bat egingo, eta "arbuiatzeko" eskatu diote langileei.
ABB-Niessen enpresan gehiengo duten LABek eta UGTk zuzendaritzarekin aurreakordioa sinatu eta horrekin bat egingo ez duela adierazi du ELAk.
“2020tik erorita dagoen akordioa”, gogorazi du sindikatu horrek. ELAk erabaki hori “guztiz arbuiatzen” duela esan dute. “Uste dugu edukiak ez direla enpresaren proposamena onartzeko nahikoa”, gaineratu dute. “Gogoratu behar da enpresak azken urteetan milioiak irabazi dituela”.
Enpresa batzordearen puntu garrantzitsuenak beteko ez direla uste dute, gainera. Esan dutenez, soldata igoerek ez dute KPIa bermatzen, “eta kontsolidatuko ez diren ordainketak onartzen dituzte”.
“Gainera”, gogorarazi dute, “asanbleak iaz 2021erako %0,85eko igoerari uko egin zion igoera eskasa zelakoan. Akordio honetan, %0,7 inguruko igoera adosten dute”.
Bajen osagarriak %100era igotzeko enpresak trukean langile ebentualei %80 ordaintzeko aukera bermatu nahi izan dutela esan dute.
Gauez lan egiten duten pertsonen baldintzen hobekuntzak enpresaren erabaki subjektiboetan geratzen dela salatu dute. Horrez gain, beste hainbat hobekuntza “akordiotik kanpo” geratu direla esan du ELAk: “Kaleratzeen blindatzea, lan-orduen jaitsiera…”.
Horregatik, langileei eskatu diete aurreakordio horri babesik ez ematea. “Benetan uste dugu baldintza hobeak lortzeko aukera ona galtzen ari garela”.
