Ongi etorri, Orgasmo
Oiartzungo Gazte Sortzaileek elkarlanaren bidea indartzeko Orgasmo sortu dute. Argi dute zer, zertarako, eta nola nahi duten.
dav Oiartzungo sortzaile gazteek aurrera urratsa egin dute. Indarrak batzeko, elkar ulertzeko, elkarlan espazioak urratzeko bidearen zati handi bat egina dute jada, eta erabaki dute herriaren eta munduaren aurrean euren sormen asmoen berri emateko labela sortzea, Orgasmo. “Hasierako asmoa orgasmo bilakatu zen. Orgasmoa da elikatuz sortzea. Oiartzungo Gazte Sortzaileak gara eta hemen hasiko da gure orgasmoa, zuen orgasmoa, asmotik sortutako orgasmoa. Ongi etorri, beraz, Orgasmo”.
Gaur eman dute erakundetzearen berri herriko sortzaileek, Arizmendienean egindako agerraldian. Aipatu dute euren interesen alde saretzeko erabakia ez zela izan ausazkoa, “sarea kordel eta zulo bezala baino, lotura eta espazio gisa ulertzen dugulako, agian”. Sortzaileen amaraunaren behar fisikoetatik harago (entseatzeko lokala, finantzazioa…), eurena babes espazioa dela aldarrikatu dute, batzeak indartuko dituelako, eta iritzi trukeak aberatsago egingo dituelako. Iritzietan sakonduz, bat nabarmendu dute: “Sormena ere politikoa da”. Kulturatik, sormenetik, gizartean eragin daitekeela uste dute, beraz.
Sortzaile bezala eztabaidetatik ez dutela ihes egin nahi izan adierazi dute pertsonak eraldatzeko tresnatzat artea duten oiartzuar gazteek. Orgasmoren oinarri-oinarrian dago feminismotik landu nahi dituztela zapalkuntza eta botere harremanak. Bizi diren testuinguruaz ere gogoeta egin dute: “Testuinguru jakin batean sortzen dugu. Gure kasuan, Euskal Herrian eta euskaraz. Mundu globalizatu bateko hizkuntza minoritarioa izenik, hau ere, hautu politikoa da”. Eta gazte sortzaileen baldintzak prekario hitzarekin harremantzeak egiatik asko duela zabaldu dute, “kulturaren egoera prekarioa bada, sortzaile gazteena prekarioagoa da are”.
Herritik, herriarentzat
Orgasmoren DNAn ideiarik bada, batzearena da. Norbanako horien izaera eta nortasuna galdu gabe, baina indarra metatzea. Norberak bere aldetik bai, baina indarra egiteko eskuak emanda hobe. Hori esatetik egitera jauzia egina dago jada. “Baliabideak ditugu, sortzeko espazioa dugu, partekatzeko eremuak baditugu, egoteko, eztabaidatzeko…. Emanaldiak ere egiten ditugu”, adierazi du Josu Ibargurenek. Baina era berean, gazte oiartzuarrek ulertu dute sormena ere era kolektiboan landu daitekeela, burbuiletatik harago, Izaro Telletxeak adierazi duenez: “Horrelako espazioek ematen digute aukera beste jende batek zer sortzen duen jasotzeko, elikatzeko, ikasteko, elkartzeko. Topagune izateak, gainera, gure aldarriak mahaiaren gainean jartzeko aukera ematen digu, indartsuago izateko”.
Espazio intimoan landutakoa, herriaren aurrera jarri dute. Eragiten ari dira Oiartzunen. Hainbat emanaldi egin dituzte herrian jada, hitzez adierazten dutena artearekin ere azaltzeko. “Harrera oso ona zian dute egin ditugun emanaldiek. Erantzun handia izan dute. Pozik gaude”.
Arteak mugarik ez du. Dudarik ez da. Baina hasiera batez Orgasmoren asmoa da bertatik, herritik, eta herriarentzat eragitea, esperimentatzea, kolektiboki sortzen joatea. Zazpi kidek izan dituzte esku artean gaurko aurkezpenean Orgasmo hitza zuten kartelak. Serio arraio azaldu dute hitz egin dutenek zer diren, zer nahi duten, eta nola nahi duten. Serio doa Orgasmo.
