Korrikako 'Euskaparate' lehiaketak baditu saridunak
Gaur goizean eman ditu jakitera epaimahaiak eskualdeko erakusleiho txukunenen izenak. Udalerri bakoitzeko bana hautatu dute.
Eskualdeko saria jaso duen Errenteriako Almacenes Iztieta dendako erakusleihoa. 
Gaur goizean eman ditu aditzera epaimahaiak Korrikako Euskaparate Lehiaketaren I.ekitaldiko irabazleen izenak. Eskualdeko udalerri bakoitzean parte hartu duten merkataritza, ostalaritza edo bestelako saltokien artean bana hautatu dute.
Korrikaren kariaz, Errenteriako, Lezoko, Oiartzungo eta Pasaiako Udalek, Oarsoaldeko Euskara Batzordearen bitartez, antolatu dute egitasmoa. Guztira 11 establezimenduk hartu dute parte, Errenteriako-Oreretako hiruk, Lezoko nahiz Oiartzungo banak, eta Pasaiako seik. Antolatzaileek aitortu dute, dena den, beste saltoki batzuek ere apaindu dituztela euren erakusleihoak 22. Korrikagatik, lehiaketan parte hartu gabe.
Izena emandakoen artean onenak hautatu ditu epaimahaiak. Horratx: Errenteria-Oreretako Begi optika; Lezoko Taloka gozotegi-kafetegia; Oiartzungo El Paso arropa denda; eta Pasai Antxoko Raquel Dominguez botika.
Sari nagusia edo eskualdeko saria Errenteriako Almacenes Iztietak jaso du; azken horrek bezeroen artean 5 euroko 80 deskontu txartel banatzeko diru saria eskuratu du, eta herri bakoitzeko irabazleak 5 euroko 40 deskontu bonu banatzeko finantziazioa.
