Arramendi pasealekuko bizilagunei babesa eman diete
Apirilaren 16an iraungiko da duela 15 urte sinatutako kontratua, eta familia horien etxegabetzea saihesteko bildu dira gaur Bulebarrean.
Bulebarreko elkarretaratzea bizilagunak babesteko. Apirilaren 16an iraungiko dira duela 15 urte Eusko Jaurlaritzako Etxebizitza Sailak Jaureguizar enpresarekin sinatutako babes ofizialeko etxeetako alokatze kontratuak. Etxebizitza horiek Arramendi pasealekuko 3, 5 eta 7 zenbakietan bizi diren bizilagunenak dira, eta familia horien etxegabetzeak saihesteko, elkarretaratzea egin dute gaur goizean Donostiako Bulebarreko kioskoan bizilagun horiek babesteko eta aldarrikapenak plazaratzeko.
Alde batetik, bloke horietan bizi diren 40 familien jarraitasuna eskatu dute apirilaren 16tik aurrera. Horrez gain, Jaureguizar enpresari eskatu diote, Lurralde Plangintza, Etxebizitza eta Garraioetako sailburuak ebatzitako 2021eko abenduaren 7ko 6319 dekretura heldu dadin, bukatzear dauden edo bukatuta dauden alokairuekin jarraitzeko eta enpresa jabeei diru laguntzak jasotzeko aukera eskaintzen duena.
Errenteriako Udalbatzak emandako laguntza eskertu dute, martxoaren 29an egindako osoko bilkuran bizilagunen eta Kaleratzeak Stop-en aldarriekin bat bat egin zutelako. Gainera, Jaureguizar enpresarekin eta Eusko Jaurlaritzarekin bitartekari lana egitea eskatu zioten udalari. Horren harira, zehaztu dute ez dutela baztertzen Eusko Jaurlaritzari tanteo eta erretraktu eskubidea gauza dezan eskatzea, etxebizitzak BOEen prezioan erosiz alokairu sozialak mantentzeko.
Hori dela eta, astelehenean bidalitako burofax baten bidez, bizilagunek eta Kaleratzeak Stop-ek errentatzaileari jakinarazi diote kaltetuek ez dituztela etxebizitzak hustuko apirilaren 16an, egungo errenta babestua ordaintzen jarraituko dutela eta espero dutela errentatzaileak ez ditzala kontratua bukatzeagatiko etxegabetze demandak aurkeztu.
Etxebideko zerrendetatik
BOE horietan bizi diren familiak Etxebideko zerrendetatik zetozela eutsi dute, alokairu sozialeko etxebizitza baten eskatzaile gisa. Ordurako jada alokairuko merkatu pribatuan edo hipoteka mailegu bat eskuratzeko zailtasunak zituztela nabarmendu dute. Egoera horrek bere horretan jarraitzen duela baietsi, eta, gainera, egungo egoerak larriagotu duela aitortu dute.
Errentatzaileak maizter askoren egoera zein den badakiela adierazi dute. Bizilagun horiek alokairu babestuaren zenbatekoa finkatzeko, errenta aitorpenak bidali behar dituzte urtero. Horrez gain, salatu dute maizter horiek antzinatasuna galdu dutela Etxebiden BOE horietan bizitzera iritsi zirenetik, eta, beraz, ez dutela inongo aukerarik epe ertainean alokairu sozialeko etxebizitza bat eskuratzeko.
Bukatzeko, eutsi dute, familia horiek guztiek urtean daramatzatela udalerrian bizitzen, eta etxebizitza horietan jarraitzeko borondatea dutela eta kaleratuko ez dituztela.
