[Bideoa eta galeria] Korrikaren sua piztu dute Beraunen
Korrika Errenteria-Oreretan dago jada. Ikasle gazteenak hasi dira Korrika Txikian parte hartzen, eta lehenak, Beraungoak izan dira.
Korrika Txikia Pablo Sorozabal plazara iristen. Korrika iritsi da Errenteria-Oreretara. Bere formatu nagusia igande goizaldean iritsiko bada ere, herriko ikastetxeetako ikasleak hasi dira euren hankak astintzen euskararen alde. Gaur goizean Beraungo Korrika Txikia egin dute Cristobal Gamon eta Bizaraingo ikasleek, eta giroa, izugarria izan da. Lehenik eta behin, ikasleak euren ikastetxeetatik atera dira 10:30ean, eta Beraungo auzotik ibilbidea osatu ondoren, Pablo Sorozabal plazan elkartu dira. Bertan, ikastetxe bakoitzeko ikasle banak Korrikarekin lotutako mezu bat irakurri dute, eta DJ Burgueteren laguntzaz, ikasleek Korrikako abestiak dantzatu eta interpretatu dituzte. Beraungoa izan da Korrikaren sua piztu duena, baina Korrikak aurrera darrai. Beraungo lekukoa Erdiguneko Korrika Txikiak hartuko du gaur arratsaldean, 15:30ean.
