Pasaitarren etorkizunari buruz hausnartzeko goiza izan da gaurkoa
Azpiegiturak, mugikortasuna eta ingurumena dira bizilagunen kezka nagusiak. Aldundiak eta udalak mahai gainean jarri dituzte horiek gaur.
Markel Olano eta Izaskun Gomez, gaur goizean Donibanen. 
Iragan urteko irailaren 29an Trintxerpen kokatu zuen Gipuzkoako Foru Aldundiak Etorkizuna Eraikiz kapsula, pasaitarrak 2040erako zer-nolako Gipuzkoa nahi luketen hausnartzera gonbidatu zituena. Guztira 101 ekarpen jaso zituen tresnak Pasaian.
Erantzun horiekin pasaitarren kezka nagusiak identifikatu ahal izan dituzte bi erakundeek. Azpiegiturei, mugikortasunari eta ingurumenari lotutako proposamenak eta ezinegonak nagusitu dira. Horien atzetik, zahartzeari eta gazteek aisialdirako eta lanerako dituzten aukerei buruzko ideiak ere proposatu zituzten herritarrek.
Gaur goizean Gipuzkoako diputatu nagusia, Markel Olano, Izaskun Gomez alkatearekin bildu da, hain zuzen, Pasaiako etorkizuneko proiektuei buruz hausnartzeko. Haiekin egon dira, halaber, Ingurumeneko, Gizarte Politikako eta Mugikortasuneko diputatuak, Jose Ignacio Asensio, Maite Peña eta Rafaela Romero, hurrenez hurren.
Kapsula “tresna eraginkorra” izaten ari dela aipatu du Olanok, dagoeneko 21 herri eta lau unibertsitate campusetan egon baita, gipuzkoarrengandik 3.000 ekarpen baino gehiago jasoz. Diputatu nagusiaren arabera, ibilbidean zehar jasotako ekarpen guztiak foru erakundearen aurrekontu parte-hartzaileen prozesuan kontuan izango dira.
Gaurko bisitan bi erakundeek azken urteotan elkarlanean egindako proiektuen errepasoa ere egin dute. Artean, Adinberri zahartze osasungarrirako zentroa aipatu dute: azken horrek adinekoentzako egoitza bat eta berrikuntza unitate bat izango ditu, eta obrak aurten bertan hastea aurreikusi dute.
