Igandean, 'Nahiak' kantata estreinakoz
Herriko historia berreskuratzeaz gain, etorkizun hurbileko erronken inguruko hausnarketa izango du helburu. 19:00etan hasiko da emanaldia.
Ezkerretik eskuinera, Iñaki Queralt Artxibo eta Liburutegi udal zinegotzia, Aizpea Otaegi Errenteriako alkatea, Iñigo Legorburu kantataren letren egilea, Iñigo Casali musika konpositorea, eta Andoni Sierra eta Arantxa Arzamendi, Andra Mari abesbatzaren zuzendari eta lehendakaria, hurrenez hurren. Datorren igandean, apirilaren 10ean, Errenteriako Lekuona Fabrikan “Nahiak” izeneko kantataren emanaldia eskainiko dute, estreinaldian. Emanaldia arratsaldeko 19:00etan hasiko da, eta ordubete iraungo du.
Gaur eguerdian, bada, egitasmoa aurkeztu dute sortzaileek. Prentsaurrekoan azaldu duten moduan, elkarlanean ekoiztutako kantata da honakoa. Izatez, kantatak abestu egiten diren musikak dira, abesbatza, bakarlari eta musika taldeek lagunduta. Kantataren musika Iñigo Casali konpositoreak sortu du, eta letren zein testuen egilea, ordea, Iñigo Legorburu da. Era berean, obra Andoni Sierra Andra Mari abesbatzaren zuzendariak zuzenduko du, elkarte berdineko orkestra eta Irene Fraile, Ana Sagastizabal, Josu Cabrero eta Jesus Garcia bakarlariekin batera. Errenteriako Udala eta Arte Eskola zein Donostiako Francisco Escudero kontserbatorioa elkarlanean aritu dira aipatutakoekin.
Besteak beste, “Nahiak” Errenteria-Oreretako herriaren sorreraren urteurrenaren harira sortutako proiektua da. Andra Mari abesbatzaren proposamena izan zen herria kantata bidez omentzea, izan ere horrelako aurrekaririk ez zegoen eta. Hala, helburua herriaren historia gogorazi eta omentzea izango da batetik; eta bestetik, aurrerantzean Errenteriak herri gisa edukiko dituen erronken inguruko hausnarketa ariketa bat izan nahi du kantatak. Horregatik, askotarikoak izango dira emanaldian ukituko diren gaiak: ingurunea, migrazioa, teknologia, etab. Casali eta Legorbururen hitzetan, pandemia testuinguruan oztopoak nabariak izan badira ere, elkarlan bidez aurrera egin du proiektuak. Bestela, emanaldia zuzena eta hurbila izango dela gaineratu dute, ikusleak gehiegi pentsatu behar gabe barnera dezan.
Sarrerak dagoeneko salgai daude, hiru eurotan. Internet bidez erosi daitezke esteka honetan; edo Lekuona fabrikan bertan fisikoan: gaur, ostirala, arratsaldeko 20:00ak arte; bihar, larunbata, goizeko 09:00etatik arratsaldeko 14:30etara; edo igandean, emanaldia hasi baina ordubete lehenago arte.
