'Lezo'ko baserriak, oroitu ditzala herriak' liburua aurkeztu dute
Eneko Salaberria diseinatzaileak aitak duela 51 urte Lezoko baserri gehienei ateratako argazki bilduma berreskuratu du.
Ezkerretik eskuinera, Jesus Mari Martiarena Lezoko alkatea, Eneko Salaberria egilea eta Ion Pombar Kultur zinegotzia, gaur goizeko aurkezpenean. Gaur goizean “Lezo’ko baserriak, oroitu ditzala herriak” liburua aurkeztu da Lezoko Kultura Aretoan. Bertan, Eneko Salaberria diseinatzaile eta Dixidu estudioko arduradunak Javier Salaberria aitak duela 51 urte orduko Lezoko baserri gehienei ateratako argazkiak jaso ditu. Aurkezpenean, Jesus Mari Martiarena Lezoko alkatea, Ion Pombar Kultura zinegotzia eta Xanti Val kultur teknikaria izan ditu lagun.
Etxean, txikitatik izan dute jatorrizko albuma, eta haren esanetan, askotan aipatu izan genuen altxor horrek, nolabait, Lezora itzuli behar zuela, herriarentzat egindako zerbait zelako. Javier Salaberriak afizio asko zituen, semearen esanetan, eta horietako bat zen argazkigintza. Urteetan zehar proiektua atzeratu bazuen ere, iaz argazkien berrogeita hamargarren urteurrena bete zela baliatuz, Salaberriak baserrien irudien negatiboak bilatu eta banan bana eskaneatu zituen. Ondoren, udalaren laguntzaz, liburua maketatu eta argitaratzeko aukera izan zuen. Liburuak etxekoen hitz batzuk jaso ditu ere.
Aurrerantzean, egileak udalari dohaintzan emango dio jatorrizko albuma, eta Lezo herriaren ondare izatera igaroko da. Xanti Valen iritziz, lan honek lezoarren ondarea osatzen lagundu du. Memoria historikoak bizirik irauteko beste urrats bat da honakoa.
